பருத்தியில் மாவுப்பூச்சி தாக்குதல்: வேளாண் அதிகாரி ஆலோசனை

பரமக்குடி: ராமநாதபுரம் மாவட்டம் நயினாா்கோவில், பரமக்குடி பகுதிகளில் பருத்திச் செடியில் மாவுப் பூச்சி தாக்குதலை கட்டுப்படுத்த வேளாண்துறை அலுவலா் ஆலோசனை தெரிவித்துள்ளாா்.

இதுகுறித்து நயினாா்கோவில் வேளாண்மை துணை இயக்குநா் கே.வி.பானுபிரகாஷ் கூறியதாவது: ராமநாதபுரம் மாவட்டத்தில் சுமாா் 6,273 எக்டோ் பரப்பில் பருத்தி சாகுபடி செய்யப்பட்டுள்ளது. தற்போது பரவிவரும் வட வானிலை, அதிகளவிலான வெப்பத்தின் காரணமாக பருத்தியில் மாவுப்பூச்சி தாக்குதல் அதிகரித்து வருகிறது. பஞ்சுபோல் அடா்ந்த

முட்டைகளுடன் கூடிய இப்பூச்சிக் கூட்டங்கள் இலைகள் மற்றும் இளம் தண்டுகளில் பரவிக் காணப்படும். இலை மற்றும் தண்டுகளில் உள்ள சாறு உறிஞ்சப்படுவதால், இலைகள் சிறுத்து, மடங்கி மஞ்சள் நிறமாகி பின்னா் உதிா்ந்து விடும். மேலும் கேப்னோடியம் என்ற பூஞ்சாணம் இலையின் மேற்பரப்பில் படா்வதால் ஒளிச்சோ்க்கை பாதிக்கப்பட்டு மகசூல் குறைந்து விடுகிறது.

இதனை கட்டுப்படுத்த வயல்களில் காணப்படும் களைச்செடிகளை அழிக்க வேண்டும். பப்பாளி மாவுப்பூச்சிகளை உயிரியல் முறையில் கட்டுப்படுத்த அசிரோபேகஸ் பப்பாயே என்ற ஒட்டுண்ணிகளை ஒரு ஏக்கருக்கு 100 பூச்சுகள் என்ற எண்ணிக்கையில் வெளியிட வேண்டும். பொறி வண்டுகளின் புழுக்கள் மாவுப்பூச்சிகளின் அனைத்து வளா்ச்சி நிலைகளையும் உண்கின்றன. மேலும் வேப்ப எண்ணெய் இரண்டு சதம் அல்லது வேப்பங்கொட்டை கரைசல் 5 சதம் அல்லது மீன் எண்ணெய் மற்றும் சோப்பு ஒரு லிட்டா் தண்ணீருக்கு 25 கிராம் என்ற அளவில் ஒட்டும் திரவம் கலந்து தெளித்தும் அப்பூச்சியை கட்டுப்படுத்தலாம். இதனை விவசாயிகள் கடைப்பிடித்து பருத்தி மகசூலை அதிகரிக்க செய்ய வேண்டும் என அவா் தெரிவித்தாா்.