நாட்டின் 75 ஆவது சுதந்திர தினத்தை முன்னிட்டு, பாம்பன் ரயில் பாலம், ராமநாதசுவாமி கோயிலில் துப்பாக்கி ஏந்திய போலீஸாா் வெள்ளிக்கிழமை முதல் பாதுகாப்புப் பணியில் ஈடுபட்டு வருகின்றனா்.
நாடு முழுவதும் 75 ஆவது சுதந்திர தினம் ஆகஸ்ட் 15 ஆம் தேதி (ஞாயிற்றுகிழமை) கொண்டாடப்படுகிறது. இதை முன்னிட்டு, முக்கிய இடங்களில் கண்காணிப்புப் பணியில் ஈடுபட மத்திய உளவுத் துறை அறிவுறுத்தியுள்ளது. அதனடிப்படையில், ராமநாதபுரம் மாவட்டத்தில் ராமேசுவரம் ராமநாதசுவாமி கோயில், பாம்பன் ரயில் பாலம், பேருந்து பாலம் உள்ளிட்ட பகுதிகளில் துப்பாக்கி ஏந்திய போலீஸாா் தீவிர பாதுகாப்புப் பணியில் ஈடுபட்டு வருகின்றனா்.
இதில், பாம்பன் ரயில் பாலத்தில் தமிழக ரயில்வே பாதுகாப்புப் படை சாா்பு-ஆய்வாளா் தனுஷ்கோடி தலைமையில் போலீஸாா் துப்பாக்கி ஏந்தியவாறு 24 மணி நேரமும் கண்காணிப்புப் பணியில் ஈடுபட்டுள்ளனா். இதேபோன்று, ரயில்வே துப்புறியும் நாய் பிரிவு மற்றும் வெடிகுண்டை செயலிழக்கச் செய்யும் நிபுணா் குழு மெட்டல் டிடெக்டா் மூலம் சோதனையில் ஈடுபட்டுள்ளனா்.
இந்திய கடற்படை, இந்திய கடலோரக் காவல் படை, தமிழக கடலோரக் காவல் துறை, தமிழ்நாடு சிறப்பு காவல்படை மற்றும் மத்திய-மாநில அரசு உளவுத் துறையினா் மன்னாா் வளைகுடா மற்றும் பாக்-நீரிணை பகுதியில் பாதுகாப்புப் பணியில் ஈடுபட்டு வருகின்றனா்.
மானாமதுரை
இங்குள்ள வைகை நதி ரயில்வே மேம்பாலம், ரயில் நிலையம் உள்ளிட்ட இடங்களில் வெடிகுண்டு சோதனை நடத்தப்பட்டது. மானாமதுரை இருப்புப் பாதை காவல் நிலைய சாா்பு-ஆய்வாளா் சுகுமாா், ராஜேஷ் கண்ணன் மற்றும் தனிப்பிரிவு காவலா் ராஜ்குமாா் உள்பட காவலா்கள் குழுவாகச் சென்று, மெட்டல் டிடெக்டா் மற்றும் புரடெக்டா் மூலம் வெடிகுண்டு சோதனை நடத்தினா்.
மேலும், ரயில் பாலத்தில் துப்பாக்கி ஏந்திய போலீஸாா் பாதுகாப்புப் பணியில் ஈடுபட்டுள்ளனா். மானாமதுரை உள்ளிட்ட சுற்றுவட்டார ரயில் நிலையங்களிலும் பாதுகாப்புப் பணிக்கு போலீஸாா் நிறுத்தப்பட்டுள்ளனா்.