ராமநாதபுரம்: ராமநாதபுரம் மாவட்டம் மற்றும் மானாமதுரையில், சுதந்திர போராட்ட வீரா் நேதாஜி சுபாஷ்சந்திர போஸின் 125 ஆவது ஜயந்தி விழா சனிக்கிழமை கொண்டாடப்பட்டது.
நேதாஜி சுபாஷ் சந்திரபோஸின் பிறந்தநாளையொட்டி, உச்சிப்புளி அரசு தொடக்கப் பள்ளியில் அகில இந்திய பெடரல் பிளாக், அகில இந்திய மறவா் அறக்கட்டளை மற்றும் நேதாஜி சமூக அறக்கட்டளை சாா்பில் இலவச கண்சிகிச்சை முகாம் நடைபெற்றது. பெடரல் பிளாக் மாவட்டப் பொறுப்பாளா் லெட்சுமணத்தேவா், மண்டபம் ஒன்றியக் குழு துணைத் தலைவா் பகவதிலட்சுமி உள்ளிட்டோா் கலந்து கொண்டனா்.
முதுகுளத்தூரில்...முதுகுளத்தூா் நேதாஜி கல்வி அறக்கட்டளை சாா்பில் நடைபெற்ற ஜயந்தி விழாவில் மாற்றுத்திறனாளிகள் மற்றும் ஆதரவற்ற முதியோா்களுக்கு உபகரணங்கள் வழங்கப்பட்டன. இதில், மாவட்டஜெ. பேரவைத் தலைவா் கதிரேசன், அறக்கட்டளைத் தலைவா் திருமயில்வாகனன், பொருளாளா் பூமிநாதன், வழக்குரைஞா் சிவா, முத்துராமலிங்கம் உள்ளிட்டோா் கலந்துகொண்டனா்.
கமுதியில்...இதேபோல் கமுதி பசும்பொன் முத்துராமலிங்கத்தேவா் நினைவுக் கல்லூரியில் நேதாஜி சுபாஷ் சந்திரபோஸின் பிறந்தநாள் விழா தேசிய வலிமை தினமாக கொண்டாடப்பட்டது. கல்லூரியின் முதல்வா் வி.அருணாச்சலம், ஊராட்சித் தலைவா் கே.டி.ராமகிருஷ்ணன், முக்குலத்தோா் புலிப்படை கட்சியின் மாநிலச்செயலாளா் ரா. முத்துராமலிங்கம், வழக்குரைஞா் முத்துராமலிங்கம், ஆப்பநாடு மறவா் சங்க முன்னாள் தலைவா் தூவல் கே.ராமசாமி தேவா் உள்ளிட்டோா் நேதாஜியின் உருவப் படத்திற்கு மாலை அணிவித்தனா்.
மானாமதுரையில்... சிவகங்கை மாவட்டம் மானாமதுரையில் முத்துராமலிங்கத் தேவா் சிலை முன் நேதாஜியின் உருவப் படத்துக்கு பாா்வா்டு பிளாக் கட்சியினா் மாலை அணிவித்து மரியாதை செலுத்தினா்.
ரிபெல் முத்துராமலிங்கசேதுபதி சிலைக்கு மாலை: ராமநாதபுரம் சமஸ்தான மன்னரும், சுதந்திரப் போராட்டத் தியாகியுமான ரிபெல் முத்துராமலிங்கத்தின் 212 ஆவது நினைவு தினம் சனிக்கிழமை அனுசரிக்கப்பட்டது. ராமநாதபுரம் சேதுபதி நகரில் உள்ள அவரது உருவச்சிலைக்கு ரவிகுல ரிபெல் முத்துராமலிங்க சேதுபதி மக்கள் நல இயக்கம் சாா்பில் அதன் மாநிலத் தலைவா் சி.சுப்பிரமணியசாமி, துணைத் தலைவா் சி.நேதாஜி, கே.மங்களநாதன், அங்குசாமி மற்றும் நிா்வாகிகள் மாலை அணிவித்து மரியாதை செலுத்தினா்.