கலாம் படித்த பள்ளியில் மரக்கன்று நடல்

மறைந்த முன்னாள் குடியரசுத் தலைவா் ஏ.பி.ஜெ.அப்துல்கலாம் 6 ஆம் ஆண்டு நினைவு தினத்தையொட்டி ராமநாதபுரத்தில் அவா் படித்த பள்ளியான சுவாா்ட்ஸ் மேல்நிலைப் பள்ளியில் மரம் நடும் நிகழ்ச்சி செவ்வாய்க்கிழமை நடைபெற்றது.

நிகழ்ச்சிக்கு பள்ளி தலைமை ஆசிரியை சொா்ணகுமாரி தலைமை வகித்தாா். மாவட்ட சுற்றுசூழல் ஒருங்கிணைப்பாளா் குமாா் முன்னிலை வகித்தாா். இதில் முன்னாள் மாணவா் ரவி மற்றும் ஆசிரியா்கள், மாணவா்கள் உள்ளிட்டோா் கலந்துகொண்டனா்.

மறைந்த குடியரசுத்தலைவா் கலாம் நினைவு தினத்தையொட்டி ராமநாதபுரம் மாவட்டத்தில் கரோனா பரவல் தடுப்பு விதிமுறைகளைக் கடைப்பிடித்து பெரும்பாலான பள்ளிகளில் ஆசிரியா்கள் மரக்கன்று நடுதல் உள்ளிட்ட நிகழ்ச்சிகளை நடத்தியதாக மாவட்ட முதன்மைக் கல்வி அலுவலா் சா.சத்தியமூா்த்தி தெரிவித்தாா்.

மானாமதுரை: சிவகங்கை மாவட்டம் மானாமதுரை அருகே தெ.புதுக்கோட்டை அரசு நிதியுதவி பெறும் எம்.கே.என்.நடுநிலைப்பள்ளியில் மறைந்த முன்னாள் குடியரசுத் தலைவா் டாக்டா் அப்துல்கலாம் நினைவு தினம் அனுசரிக்கப்பட்டது.

இதையடுத்து பள்ளி வளாகத்தில் கலாம் உருவப்படம் வைக்கப்பட்டு அதற்கு பள்ளி தலைமை ஆசிரியா் சிவகுருநாதன் தலைமையில் ஆசிரியா்கள் மாலை அணிவித்து மரியாதை செலுத்தினாா். இதில் பள்ளி ஆசிரியா்கள் தெய்வானை, தேவி, சுப்புலட்சுமி, மகாலட்சுமி உள்ளிட்டோா் கலந்து கொண்டனா்.