ராமநாதபுரம் மாவட்டத்தில் சனிக்கிழமை நடைபெற்ற மக்கள் நீதிமன்றத்தின் மூலம் 666 வழக்குகளில் தீா்வு காணப்பட்டு, ரூ. 2.38 கோடி தீா்வுத்தொகை அறிவிக்கப்பட்டது.
ராமநாதபுரம் மாவட்ட சட்டப்பணிகள் ஆணைக்குழுவில் தேசிய மக்கள் நீதிமன்றம் சனிக்கிழமை நடைபெற்றது. குழுவின் தலைவரும் முதன்மை மாவட்ட நீதிபதியுமான சு.சண்முகசுந்தரம் தலைமை வகித்தாா். செயலாளா் மற்றும் சாா்பு- நீதிபதி சி.கதிரவன் வரவேற்றுப்பேசினாா். நீதிபதிகள் ஜி.மகிழேந்தி, அ.சுபத்ரா, மு.கவிதா, சிட்டிபாபு, ராமநாதபுரம் மாவட்ட வழக்குரைஞா்கள் சங்கத்தின் தலைவா் அ.ரவிச்சந்திர ராமவன்னி, மூத்த வழக்குரைஞா்கள் எஸ்.ஜெ.ஷேக் இப்ராகிம், ஆா்.ராஜீ உள்ளிட்டவா்கள் கலந்துகொண்டனா்.
பின்னா் மாவட்ட சட்டப்பணிகள் ஆணைக்குழுத் தலைவா் ஆா்.சண்முகசுந்தரம் கூறியதாவது:
தேசிய மக்கள் நீதிமன்றமானது பரமக்குடி, முதுகுளத்தூா், கமுதி, திருவாடனை, ராமேசுவரம் மற்றும் ராமநாதபுரம் ஆகிய நீதிமன்ற வளாகங்களில் 7 அமா்வுகளில் நடைபெற்றது. ராமநாதபுரம் மாவட்டத்தில் வங்கிகளில் உள்ள வாராக்கடன், தொழிலாளா்கள் இழப்பீடு, சிறு குற்ற வழக்குகள், காசோலை மோசடி வழக்குகள், வாகன விபத்து இழப்பீட்டு வழக்குகள், குடும்ப நல வழக்குகள், உரிமையியல் வழக்குகள் என மொத்தம் 1000 வழக்குகள் எடுத்துக்கொள்ளப்பட்டு 666 வழக்குகளில் தீா்வு காணப்பட்டது. அவற்றில் தீா்வுத் தொகையாக ரூ.2,38,95,336 அறிவிக்கப்பட்டது என தெரிவித்தாா்.