ராமநாதபுரத்தில் ரூ.4 லட்சம் மதிப்பீட்டில் அம்மா உணவகம் மேம்படுத்தப்பட உள்ளது என ராமநாதபுரம் நகா்மன்றக் கூட்டத்தில் தலைவா் காா்மேகம் தெரிவித்தாா்.
ராமநாதபுரம் நகா்மன்றக் கூட்டம் திங்கள்கிழமை நடைபெற்றது. தலைவா் கே.காா்மேகம் தலைமை வகித்தாா். ஆணையா் (பொறுப்பு) லட்சுமணன், துணைத் தலைவா் பிரவீன் தங்கம் ஆகி0யோா் முன்னிலை வகித்தனா்.
கூட்டத்தில் முகவை ஊருணி மேம்படுத்துதல் உள்ளிட்ட 59 தீா்மானங்கள் நிறைவேற்றப்பட்டன.
அப்போது வாா்டு உறுப்பினா்கள் பேசினா்.
கே.குமாா் (பாஜக): அல்லிக்கண்மாய் தகன மேடை முழுமையாகச் சீரமைக்கப்படவேண்டும். அக்கண்மாயை வேலி அமைத்து பாதுகாக்க வேண்டும்.
ராமநாதன் (திமுக): நகரில் புதைசாக்கடைத் திட்ட சந்திப்பு பகுதிகளில் மூடி அமைக்க வேண்டும். மழைக்காலத்தில் கூடுதல் தண்ணீா் புதைசாக்கடையில் கலந்தால் கழிவுநீா் செல்வதில் சிக்கல் ஏற்படும்.
ராமசுப்பிரமணியன் என்ற அய்யனாா் (திமுக): புதிய பேருந்து நிலையத்தில் ஓய்வறையை கடையாகப் பயன்படுத்தக்கூடாது என உத்தரவிட்டும், கடை நடைபெற்று வருகிறது.
இந்துமதி முத்துலெட்சுமி (திமுக): வனசங்கரி அம்மன் கோயில் உள்ளிட்ட பகுதியில் சாலை, குடிநீா் உள்ளிட்ட அடிப்படை வசதிகள் செய்துதர வேண்டும். கோரிக்கைகள் அடங்கிய மனு பல முறை அளித்தும் பயனில்லை. ஆகவே மக்களைத் திரட்டி போராடும் நிலை ஏற்பட்டுள்ளது.
ராஜாராம்பாண்டியன் (காங்கிரஸ்): நகரில் காவிரிக் கூட்டுக்குடிநீா் விநியோகம் முறையாக நடைபெறவில்லை. குழாய் சீரமைப்புப் பணிகள் சரிவர நடைபெறாததால் மக்கள் குடிநீா் கிடைக்காமல் அவதியடைந்து வருகின்றனா்.
மணிகண்டன் (காங்கிரஸ்): புதிய பேருந்து நிலையம் அருகேயுள்ள அம்மா உணவகத்தில் இட்லி இயந்திரம் பழுதாகிவிட்டது. அதைச் சீா்படுத்த வேண்டும். அம்மா உணவகத்தை மேம்படுத்தவேண்டும்.
தலைவா் கே.காா்மேகம்: ராமநாதபுரம் நகரில் உள்ள முகவை உருணி உள்ளிட்டவை சீரமைக்கப்படவுள்ளன. பேருந்து நிலைய ஓய்வறையில் உள்ள கடையை காலி செய்ய உத்தரவிடப்பட்டுள்ளது. விரைவில் அங்கு ஓய்வறை செயல்படும். வாா்டுகளில் சாலை, குடிநீா் உள்ளிட்ட அடிப்படை வசதிகள் நிறைவேற்றப்பட நடவடிக்கை மேற்கொள்ளப்பட்டுவருகிறது. காவிரிக் கூட்டுக்குடிநீா் சீரமைப்பு பணியில் 3 போ் ஈடுபட்டுள்ளனா். அம்மா உணவகம் ரூ.4 லட்சத்தில் மேம்படுத்தப்படவுள்ளது என்றாா்.