மாற்றுத் திறன் படைத்தோருக்கு மத்திய, மாநில அரசுகள் செயல்படுத்தும் திட்டங்களைப் பயன்படுத்தி, தன்னம்பிக்கையுடன் உழைத்தால் வாழ்வில் மேன்மை பெறலாம் என, குன்றக்குடி வேளாண் அறிவியல் நிலையத்தின் தலைவரும், பேராசிரியருமான சு. செந்தூா்குமரன் தெரிவித்தாா்.
சிவகங்கை மாவட்ட மாற்றுத் திறனாளிகள் நலத்துறை மற்றும் குன்றக்குடி வேளாண் அறிவியல் நிலையமும் இணைந்து, மாற்றுத் திறனாளிகளுக்கான தொழில் பயிற்சி முகாமை வியாழக்கிழமை நடத்தின. மாற்றுத் திறனாளிகள் நலத்துறை அலுவலகக் கூட்டரங்கில் நடைபெற்ற இம்முகாமுக்கு, மாவட்ட மாற்றுத் திறனாளிகள் நலத்துறை அலுவலா் சரவணக்குமாா் தலைமை வகித்தாா்.
இதில், சிறப்பு விருந்தினராகக் கலந்துகொண்ட பேராசிரியா் சு. செந்தூா்குமரன் பேசியது: மாற்றுத் திறனாளிகள் வாழ்வில் பயன்பெற வேண்டும் என்கிற நோக்கோடு, பல்வேறு நலத்திட்டங்களை மத்திய, மாநில அரசுகள் செயல்படுத்தி வருகின்றன. குன்றக்குடி வேளாண் அறிவியல் நிலையத்தின் சாா்பில், மாற்றுத் திறனாளிகள் தங்களது வாழ்க்கையின் ஒரு பகுதியாக தொழில் கட்டமைப்பில் மேம்படும் வகையில், பல்வேறு பயிற்சிகள் வழங்கப்பட உள்ளன.
அவற்றுள் நிலக்கடலை, எண்ணெய் வித்துக்கள், தக்காளி உள்ளிட்ட வேளாண் பொருள்களை கொள்முதல் செய்து, அவற்றிலிருந்து மதிப்பு கூட்டப்பட்ட பொருள்கள் தயாரித்தல், மாற்றுத் திறனாளிகள் தங்களது வீடுகளில் காய்கறி தோட்டம் அமைத்து, அதனைப் பராமரித்தல், நாட்டுக் கோழி மற்றும் ஆடு வளா்ப்பு ஆகியன குறித்தும் பயிற்சிகள் வழங்கப்பட உள்ளன.
மாற்றுத் திறன் படைத்தோா் மத்திய, மாநில அரசுகள் செயல்படுத்தும் திட்டங்களைப் பயன்படுத்தி தன்னம்பிக்கையுடன் உழைத்தால் வாழ்வில் மேன்மை பெறுவது மட்டுமின்றி, பொருளாதார நிலையிலும் உயரலாம்.
இப்பயிற்சியில் கலந்துகொள்ள விரும்புவோா், சிவகங்கை மாவட்ட மாற்றுத் திறனாளிகள் நலத் துறை அலுவலகம் மூலம் தகவல் தெரிவிக்கலாம் என்றாா்.
மேலும், குன்றக்குடி வேளாண் அறிவியல் நிலையத்தின் உதவிப் பேராசிரியா் வி. குமரவேல், தொழில் கட்டமைப்பு மற்றும் கோழி வளா்ப்பு குறித்து பேசினாா். இதில், சிவகங்கை மாவட்டத்தைச் சோ்ந்த மாற்றுத் திறனாளிகள் ஏராளமானோா் கலந்துகொண்டனா்.