கரோனா தொற்றுப் பரவலைக் கட்டுப்படுத்தவே வழிபாட்டுத் தலங்களுக்கு கட்டுப்பாடுகள் நீட்டிக்கப்பட்டுள்ளது என தமிழக மக்கள் நல்வாழ்வு மற்றும் குடும்ப நலத்துறை அமைச்சா் மா. சுப்பிரமணியன் தெரிவித்துள்ளாா்.
சிவகங்கை மாவட்டம், மதகுபட்டியில் செயல்படுத்தப்படும் தமிழக அரசின் ‘மக்களைத் தேடி மருத்துவம்’ எனும் திட்டம் குறித்து ஞாயிற்றுக்கிழமை ஆய்வு செய்த அமைச்சா் பின்னா் செய்தியாளா்களிடம் கூறியது:
9 ஆம் வகுப்பு முதல் பிளஸ் 2 வரையிலான வகுப்புகளை செப்டம்பா் 1 ஆம் தேதி முதல் திறப்பதற்கு உரிய வழிகாட்டு நெறிமுறைகள் வெளியிடப்பட்டு பணிகள் துரிதமாக நடைபெற்று வருகின்றன. இதில், ஆசிரியா்கள் மட்டுமன்றி பணியாளா்களும் கரோனா தடுப்பூசி செலுத்தியிருக்க வேண்டும் என அறிவுறுத்தப்பட்டுள்ளது. இதன்காரணமாக, பள்ளி மாணவ, மாணவிகளுக்கு கரோனா தொற்று பரவாது என்ற நம்பிக்கை உள்ளது.
18 வயதுக்குக் கீழ் உள்ளவா்களுக்கு கரோனா தடுப்பூசி செலுத்தும் வகையில் மத்திய அரசு வழிகாட்டு நெறிமுறைகள் வெளியிட்ட பின், கரோனா தடுப்பூசியை தமிழக அரசு நேரடியாக கொள்முதல் செய்வது குறித்து முடிவு செய்யப்படும்.
தமிழகத்தில் கரோனா பரவல் கட்டுக்குள் வந்தாலும் வழிபாட்டுத் தலங்கள் மூலம் மீண்டும் அதிகரிக்கக் கூடும் என சென்னையில் முதல்வா் மு.க.ஸ்டாலின் தலைமையில் அண்மையில் நடைபெற்ற ஆய்வுக் கூட்டத்தில் சுகாதாரத்துறை அலுவலா்கள் அறிக்கை சமா்ப்பித்தனா். அதனடிப்படையில், தமிழகம் முழுவதும் கரோனா தொற்றுப் பரவலைக் கட்டுப்படுத்தவே வழிபாட்டுத் தலங்களுக்கு கட்டுப்பாடுகள் நீடிக்கப்பட்டுள்ளன என்றாா்.
முன்னதாக, மதகுபட்டியில் ‘மக்களைத் தேடி மருத்துவம்’ எனும் திட்டம் குறித்து ஆய்வு செய்த அமைச்சா், நோயாளிகளின் வீட்டிற்கு நேரடியாகச் சென்று மருந்து மாத்திரைகளை வழங்கினாா். அதைத் தொடா்ந்து, மதகுபட்டியில் உள்ள அரசு முதியோா் இல்லத்தில் உடல் உறுப்புகள் செயலிழந்தவா்களுக்கு அளிக்கப்படும் சிகிச்சைகள் குறித்து ஆய்வு செய்த அவா், ஒக்கூரில் தன்னாா்வலா் சேக்கப் செட்டியாா் தனது சொந்த நிதியில் கட்டி வரும் அரசு மருத்துவமனைக் கட்டடத்தை பாா்வையிட்டாா்.
காரைக்குடி: இதையடுத்து காரைக்குடியில் உள்ள மாவட்ட அரசு தலைமை மருத்துவமனையில் காணல் சமுதாய கண் மருத்துவச் சேவை அறக்கட்டளை சாா்பில் ரூ. 50 லட்சத்தில் அமைக்கப்பட்டுள்ள 6 ஆயிரம் லிட்டா் கொள்ளளவு கொண்ட திரவ ஆக்சிஜன் சேமிப்புக் கலனை அமைச்சா் மா. சுப்பிரமணியன் ஞாயிற்றுக்கிழமை தொடக்கி வைத்தாா்.
பின்னா் அவா் செய்தியாளா்களிடம் கூறியதாவது: தமிழக முதல்வரின் தீவிர நடவடிக்கையால் ஆக்சிஜன் இருப்பு 989 கேஎல் அளவுக்கு தினசரி கையிருப்புக்கான வசதி உள்ளது. அதேபோன்று 210 ஆக்சிஜன் மையங்களுக்கான கட்டுமானப் பணிகள் நடைபெற்று வருகின்றன. இதில் 47 இடங்களில் பணிகள் நிறைவுற்று பயன்பாட்டிற்கு வந்துள்ளது.
தமிழக அரசின் சாா்பில் ரூ. 99 கோடியே 84 லட்சம் செலுத்தி மத்திய அரசிடமிருந்து 29 லட்சத்து 22 ஆயிரம் தடுப்பூசிகளோடு சோ்த்து இதுவரை மொத்தம் 2 கோடியே 69 லட்சத்து 91 ஆயிரத்து 100 தடுப்பூசிகள் வந்துள்ளன. அதில் 2 கோடியே 61 லட்சத்து 20 ஆயிரத்து 624 தடுப்பூசிகளும், தனியாா் மருத்துவமனைகளைப் பொருத்தவரை இதுவரை 19 லட்சத்து 36 ஆயிரத்து 723 தடுப்பூசிகளும் செலுத்தப்பட்டுள்ளன.
தமிழ்நாட்டில் இதுவரை தடுப்பூசி செலுத்திக் கொண்டவா்களின் எண்ணிக்கை 2 கோடியே 80 லட்சத்து 57 ஆயிரத்து 397. ஆனால் தமிழகத்தின் தேவையைப் பொருத்தவரை சுமாா் 12 கோடி டோஸ் தடுப்பூசிகள் வேண்டும். 6 கோடி பேருக்கு தடுப்பூசி போடப்பட வேண்டும். இப்போது கையிருப்பில் 15 லட்சம் டோஸ் தடுப்பூசிகள் உள்ளன. இன்னும் 4 நாள்களுக்கு தடையில்லாமல் தடுப்பூசி செலுத்தும் பணிகள் அனைத்து இடங்களிலும் நடைபெறும் என்றாா்.
இதைத் தொடா்ந்து காரைக்குடியில் மாவட்ட உணவுப் பாதுகாப்புத்துறை சாா்பில் செஞ்சை எம்.எஸ்.எம்.பங்களாவில் ஞாயிற்றுக்கிழமை நடைபெற்ற நிகழ்ச்சியில் புகையிலையினால் வரும் கேடுகள் மற்றும் உடல் பாதிப்புகள், நோய்த் தன்மைகள் பற்றி விளக்கும் படத்தை அமைச்சா் மா. சுப்பிரமணியன் வெளியிட, அதை காரைக்குடித் தொழில் வணிகக் கழகத் தலைவா் சாமி. திராவிடமணி, செயலாளா் எஸ். கண்ணப்பன் ஆகியோா் பெற்றுக் கொண்டனா். ஏற்பாடுகளை மாவட்ட உணவுப் பாதுகாப்புத்துறை அலுவலா் பிரபாவதி செய்திருந்தாா்.
நிகழ்ச்சிகளில், மாவட்ட ஆட்சியா் பி. மதுசூதன் ரெட்டி, மானாமதுரை தொகுதி சட்டப் பேரவை உறுப்பினா் ஆ. தமிழரசி ரவிக்குமாா், காரைக்குடி சட்டப் பேரவை உறுப்பினா் எஸ். மாங்குடி, சிவகங்கை அரசு மருத்துவக் கல்லூரி மருத்துவமனை முதன்மையா் ரேவதிபாலன், மாவட்ட சுகாதாரத் துறை இணை இயக்குநா் இளங்கோ மகேஸ்வரன், துணை இயக்குநா் ராம் கணேஷ், காணல் சமுதாய கண் மருத்துவ சேவை தலைவா் ஏ. அழகப்பன், அறங்காவலா் அ.மு.க. ரெங்கநாதன் உள்ளிட்டோா் கலந்து கொண்டனா்.
முன்னதாக காரைக்குடி அருகே கானாடுகாத்தான் அரசு மருத்துவமனையை அமைச்சா் மா. சுப்பிரமணியன் பாா்வையிட்டாா்.