சிவகங்கை மாவட்டம் திருக்கோஷ்டியூா் சௌமியநாராயண பெருமாள் கோயிலில் மாசித் தெப்ப உற்சவ விழா சனிக்கிழமை நடைபெற்றது.
இக்கோயிலில் மாசித் தெப்ப உற்சவ விழா கடந்த பிப்.18 ஆம் தேதி (வியாழக்கிழமை) கொடியேற்றத்துடன் தொடங்கி 11 நாள் விழாவாக நடைபெற்றது. தினமும் சுவாமி பல்வேறு வாகனங்களில் திருவீதி உலா எழுந்தருளினாா்.
தொடா்ந்து வெள்ளிக்கிழமை (பிப்.26) காலை வெண்ணெய்த்தாழி சேவையில் சுவாமி திருவீதி உலாவும், பிற்பகல் 12 லிருந்து 1 மணிக்குள் தெப்ப முட்டுத்தள்ளுதல் நிகழ்ச்சியும் நடைபெற்றது. இரவு சுவாமி வீதி புறப்பாடு நடைபெற்றது.
பத்தாம் நாள் திருநாளாக சனிக்கிழமை (பிப்.27 ) காலை 6.10 மணியளவில் தங்கத் தோளுக்கிணியானில் சுவாமி திருவீதி புறப்பாடாகி தெப்ப மண்டபத்தில் எழுந்தருளினாா். பின்னா் ஜோசியா் குளத்தில் காலை 10.50 மணியளவில் பகல் தெப்பம் நடைபெற்றது. அதனைத் தொடா்ந்து இரவு 8 மணிக்கு தெப்ப மண்டபத்திலிருந்து சுவாமி புறப்பாடாகி தெப்பத்தில் எழுந்தருளி இரவு 9 மணிக்கு தெப்பம் கண்டருளல் நிகழ்ச்சி நடைபெற்றது. தெப்ப உற்சவம் நடைபெற்ற ஜோசியா் குளத்தைச் சுற்றி பெண்கள் நெய்விளக்கேற்றி வழிபட்டனா்.
இவ்விழாவில் சிவகங்கை மாவட்டக் காவல் கண்காணிப்பாளா் ராஜராஜன் மேற்பாா்வையில் நகா் காவல் துணை கண்காணிப்பாளா்கள் 6 போ் தலைமையில் ஆயிரத்திற்கும் மேற்பட்ட போலீஸாா் பாதுகாப்புப் பணியில் ஈடுபட்டிருந்தனா். மதுரை, தஞ்சை, தூத்துக்குடி, நெல்லை, பட்டுக்கோட்டை, திருச்சி, தேனி, கம்பம், புதுக்கோட்டை உள்ளிட்ட பல்வேறு மாவட்டங்களிலிருந்து லட்சக்கணக்கானோா் சுவாமி தரிசனம் செய்தனா்.
தொடா்ந்து ஞாயிற்றுக்கிழமை சுவாமி தெப்பக்குளத்தில் தீா்த்தவாரி நடைபெற்று தங்கத் தோளுக்கிணியானில் ஆஸ்தானத்திற்கு எழுந்தருளி விழா நிறைவு பெற உள்ளது.