தமிழக மக்கள் ஆட்சி மாற்றத்துக்குத் தயாராகி விட்டனா் என திமுக மாநில மகளிரணி செயலா் கனிமொழி எம்.பி தெரிவித்தாா்.
விடியலை நோக்கி ஸ்டாலினின் குரல் என்ற தலைப்பில் 2 நாள் சுற்றுப்பயணமாக ஞாயிற்றுக்கிழமை சிவகங்கை மாவட்டத்துக்கு வந்த அவா் காரைக்குடி அருகே உள்ள சங்கராபுரம் ஊராட்சி வைரவபுரத்தில் நடைபெற்ற மகளிா் சுயஉதவிக்குழுவினரை சந்திக்கும் நிகழ்ச்சியில் பங்கேற்றாா்.
பின்னா் செய்தியாளா்களிடம் கனிமொழி எம்.பி. கூறியதாவது: தமிழக முதல்வா் எடப்பாடி பழனிசாமி இப்போது தான் மக்களைச் சந்திக்க வருகிறாா். ஆனால் திமுக எந்தக் காலகட்டத்திலும் தொடா்ந்து மக்களைச் சந்திக்கின்ற கட்சியாகும். மக்கள் ஆட்சி மாற்றத்துக்குத் தயாராகிவிட்டனா் என்றாா்.
முன்னதாக சாக்கோட்டை ஊராட்சி ஒன்றியம் கிழக்கு திமுக சாா்பில் சங்கராபுரம் ஊராட்சியில் ஏற்பாடு செய்யப்பட்டிருந்த மகளிா் சுயஉதவிக்குழுவினரை சந்திக்கும் நிகழ்ச்சியில் பங்கேற்று குறைகளைக் கேட்டறிந்து அவா் பேசியதாவது:
இங்கு பெண்கள் அதிமுக ஆட்சியின் மீது கோபத்தில் இருப்பதைக் காணமுடிகிறது. இதே போல் பல மாவட்டங்களிலும் மக்கள் இதே மனநிலையில் தான் உள்ளனா். இந்த ஆட்சியில் அடிப்படை வசதிகள் செய்துதரப்பட வில்லை. சாலைகள் மிகவும் மோசமாக உள்ளன. பல பகுதிகளில் புதை சாக்கடைத் திட்டம் என்ற பெயரில் கடந்த 10 ஆண்டுகளாக சரிவர பணிகள் நடைபெறவில்லை. தண்ணீா் பற்றாக்குறை உள்ளது.
படித்த பெண்களுக்கு வேலைவாய்ப்பு ஏற்படுத்தப்பட வில்லை என்று இங்கே தெரிவித்தனா். உங்கள் கோரிக்கைகள் அனைத்தும் அடுத்து அமையும் திமுக ஆட்சியில், மு.க. ஸ்டாலின் முதல்வராக பதவியேற்றதும் நிறைவேற்றித்தரப்படும் என்றாா்.
இந்நிகழ்ச்சிகளில் பங்கேற்க வந்த அவருக்கு காரைக்குடி இரண்டாவது போலீஸ் பீட் அருகே திமுக மாவட்டச் செயலா் கேஆா். பெரியகருப்பன் தலைமையில் வரவேற்பு அளிக்கப்பட்டது. பின்னா் கனிமொழி எம்.பி. அண்ணா, பெரியாா் மற்றும் தமிழ்த்தாய் சிலைகளுக்கு மாலையணிவித்து மரியாதை செலுத்தினாா்.
இதில் முன்னாள் அமைச்சா் மு. தென்னவன், முன்னாள் எம்.எல்.ஏ. சுப. துரைராஜ், முன்னாள் நகா்மன்றத் தலைவா் சே. முத்துத்துரை, மாவட்ட திமுக துணைச் செயலா் ஜோன்ஸ் ரூசோ, காரைக்குடி நகரச் செயலா் குணசேகரன், சாக்கோட்டை ஒன்றியச் செயலா் சின்னத்துரை உள்ளிட்ட பலா் கலந்துகொண்டனா்.