சிவகாசி மெப்கோசிலங் பொறியியல் கல்லூரியில் சனிக்கிழமை நடைபெற்ற தனித்திறன் போட்டியில் சிவகாசி பள்ளி முதலிடம் பெற்றது.
பள்ளி மாணவர்களின் ஆராய்ச்சித்திறன், தனித்திறனை மேம்படுத்தும் நோக்கத்தில் நடைபெற்ற இப்போட்டியில் விருதுநகர், தூத்துக்குடி, திருநெல்வேலி, மதுரை மாவட்டங்களில் உள்ள 32 பள்ளிகளைச் சேர்ந்த 9 மற்றும் 10 ஆம் வகுப்பு பயிலும் 1,328 மாணவர்கள் கலந்து கொண்டனர்.
இதில் மாதிரிவடிவமைப்பு, பேச்சுப்போட்டி, கட்டுரைப்போட்டி, வினாடி-வினா , ஓவியப்போட்டி ,வர்ணம் தீட்டுதல் உள்ளிட்ட போட்டிகள் நடைபெற்றன. இப்போட்டியில் அதிகப்புள்ளிகள் பெற்று சிவகாசி ஒய்.ஆர்.டி.வி. மெட்ரிக் மேல்நிலைப்பள்ளி முதலிடம் பெற்றது. இலஞ்சி பாரத்வித்யா மந்திர் இரண்டாமிடம் பெற்றது.
போட்டியில் வெற்றி பெற்றவர்களுக்கு கல்லூரி முதல்வர் எஸ்.அறிவழகன் பரிசு வழங்கினார். இதற்கான ஏற்பாடுகளை பேராசிரியர்கள் என்.கிருஷ்ணமூர்த்தி, ஏ.சக்திவேல், டபிள்யூ. வின்பிரடே சசிகாந்த் ஆகியோர் செய்திருந்தனர்.