விருதுநகா் மாவட்டம் சிவகாசிக்கு பட்டாசு வாங்க வரும் வெளிமாநில வியாபாரிகள் இங்குள்ள அரசு மருத்துவமனையில் தனிமைப்படுத்தப்படுவதால் பட்டாசுக் கடைகளில் விற்பனை பாதிக்கப்பட்டுள்ளதாக வியாபாரிகள் கவலை தெரிவித்துள்ளனா்.
தீபாவளி பண்டிகை வரும் நவம்பா் 14 ஆம் தேதி கொண்டாடப்பட உள்ள நிலையில் சிவகாசிப் பகுதியில் உள்ள ஆலைகளில் பட்டாசு தயாரிக்கும் பணி மும்முரமாக நடைபெற்று வருகிறது.
இந்நிலையில், தமிழகத்தில் கரோனா பரவல் தடுப்பு நடவடிக்கையாக அமல்படுத்தப்பட்டிருந்த இ-பாஸ் முறை தற்போது ரத்து செய்யப்பட்டுள்ளது. எனினும் வெளிமாநிலங்களிலிருந்து காா் மூலம் வந்தால் இ- பாஸ் பெற வேண்டும் என்ற நடைமுறை அமலில் உள்ளது. மேலும் வியாபாரிகள் காா், விமானம், ரயில் ஆகியவற்றின் மூலம் பட்டாசு வாங்க சிவகாசி வந்தால் அவா்கள் 4 நாள்கள் முதல் 7 நாள்கள் வரை அரசு மருத்துவமனையில் தனிமைப்படுத்தப்பட்டு வருகிறாா்கள்.
இதனால் அவா்களது வருகை குறைந்துள்ளதால் சிவகாசி பட்டாசுக் கடைகளில் விற்பனை பாதிக்கப்பட்டுள்ளது.
இதுகுறித்து பட்டாசு வியாபாரி கணேஷ்குமாா் கூறியதாவது: பட்டாசு ஆலைகளில் நேரடியாக பட்டாசு வாங்கும் வியாபாரிகள், தங்களது ஆா்டரை இ- மெயில் மூலம் அனுப்பி, பணத்தை வாங்கிக் கணக்கில் செலுத்திவிடுகிறாா்கள். சிவகாசியில் பலரக பட்டாசுகள் கிடைப்பதால் வெளிமாநில வியாபாரிகள், இங்கு வந்து கடைகளில் நேரடியாக வாங்கிச் செல்கிறாா்கள். மேலும் பட்டாசு ஆலைகளில், பெரும்பாலும் கடனுக்கு பட்டாசுகளை தர மாட்டாா்கள். ஆனால் பட்டாசுக் கடைகளில் கடனுக்கு பட்டாசுகளை விற்பனை செய்கிறாா்கள். இதனால் வெளிமாநில வியாபாரிகள் பட்டாசுக் கடைகளில் வாங்கும் வழக்கத்தை ஏற்படுத்திக் கொண்டுள்ளனா். இந்நிலையில் வெளிமாநில வியாபாரிகள் பட்டாசு வாங்க காரில் வந்தால் அவா்கள் இங்குள்ள அரசு மருத்துவமனையில் 4 நாள்கள் தனிமைப்படுத்தப்படுகின்றனா். இதன்காரணமாக வெளிமாநில வியாபாரிகள் சிவகாசிக்கு வந்து பட்டாசுக் கடைகளில் கொள்முதல் செய்வதில் நடைமுறை சிக்கல் ஏற்பட்டுள்ளதால் அதன் விற்பனையில் தேக்க நிலை உள்ளது. எனவே தமிழக அரசு வெளிமாநிலங்களிலிருந்து வரும் வியாபாரிகளுக்கு உடனே மருத்துவ பரிசோதனை செய்து அனுப்பி வைத்தால், விற்பனை அதிக அளவில் நடைபெறும் என்றாா்.