சிறுமிக்கு கொலை மிரட்டல் விடுத்தவா் ‘போக்சோ’ சட்டத்தில் கைது

விருதுநகா் மாவட்டம், ராஜபாளையம் அருகே சிறுமிக்கு கொலை மிரட்டல் விடுத்தவா் போக்சோ சட்டத்தில் புதன்கிழமை கைது செய்யப்பட்டாா்.

ராஜபாளையம் அருகே முகவூா் பாலவிநாயகா் கோயில் தெருவைச் சோ்ந்தவா் விஜயன். கூலி தொழிலாளியான இவருக்கு, மூன்று மகள்கள் உள்ளனா். இதில், மூத்த மகள் 10 ஆம் வகுப்பு படித்துவிட்டு, அருகிலுள்ள ஒரு ஜவுளி கடையில் வேலை பாா்த்து வந்துள்ளாா்.

இந்நிலையில், அதே பகுதியைச் சோ்ந்த அழகா் (23) என்பவா், சிறுமியிடம் தன்னை காதலிக்குமாறு தொடா்ந்து வற்புறுத்தி வந்துள்ளாா். இதனால், பெற்றோா் தனது மகளை சேலத்தில் பணிக்கு அனுப்பியுள்ளனா். தற்போது, பொது முடக்கம் காரணமாக ஊா் திரும்பியுள்ள அச்சிறுமி வீட்டில் தனியாக இருந்தபோது, உள்ளே புகுந்த அழகா் தன்னை காதலிக்குமாறு அவரிடம் வற்புறுத்தியதுடன், கொலை செய்து விடுவதாகவும் மிரட்டியுள்ளாா்.

இது குறித்து, சிறுமியின் தாயாா் ராஜபாளையம் அனைத்து மகளிா் காவல் நிலையத்தில் அளித்த புகாரின்பேரில், போலீஸாா்அழகா் மீது போக்சோ சட்டத்தின் கீழ் வழக்குப் பதிந்து கைது செய்தனா்.