பட்டாசுகளை பாதுகாப்பாக வெடிப்பது குறித்து விழிப்புணா்வு ஊா்வலம்

சிவகாசியில் தீயணைப்புத் துறை சாா்பில் பட்டாசுகளை பாதுகாப்பாக வெடிப்பது குறித்த விழிப்புணா்வு ஊா்வலம் செவ்வாய்க்கிழமை நடைபெற்றது.

சிவகாசி-திருத்தங்கல் சாலையில் உள்ள தீயணைப்பு நிலைய அலுவலகத்திலிருந்து இந்த ஊா்வலம் புறப்பட்டது. இதில் தீயணைப்பு நிலைய வீரா்கள் தங்களது இருசக்கர வாகனத்தில் ஊா்வலமாகச் சென்றனா். அவா்களுக்கு பின்னால் சிறிய தீயணைப்பு வாகனத்தில் நிலைய வீரா்கள் இருவா் நின்று கொண்டு, ஒலிபெருக்கி மூலம் பட்டாசு வெடிக்கும் போது பின்பற்ற வேண்டிய பாதுகாப்பு விதிமுறைகளை கூறினா்.

இந்த ஊா்வலம் நான்கு ரத வீதி, பேருந்து நிலையம், காந்தி சாலை, வெம்பக்கோட்டை சாலை, காவல் நிலைய சாலை, காமராஜா் சாலை வழியே சென்று மீண்டும் தீயணைப்பு நிலையத்தை வந்தடைந்தது.

இதற்கான ஏற்பாட்டினை நிலைய தீயணைப்பு அதிகாரி பாலமுருகன் செய்திருந்தாா்.