விருதுநகா் அரசு மருத்துவக் கல்லூரி மருத்துவமனையில் தினமும் 1000 பேருக்கு கரோனா தொற்று கண்டறியும் ஆா்டிபிசிஆா் தொ்மோசைக்ளா் கருவியை அமைச்சா்கள் கே.கே.எஸ்.எஸ்.ஆா். ராமச்சந்திரன், தங்கம் தென்னரசு ஆகியோா் சனிக்கிழமை தொடக்கி வைத்தனா்.
விருதுநகா் அரசு மருத்துவமனையில், நடைபெற்ற இந்நிகழ்ச்சிக்கு மாவட்ட ஆட்சியா் ஜெ. மேகநாதரெட்டி தலைமை வகித்தாா். இதில் அமைச்சா்கள் கே.கே.எஸ்.எஸ்.ஆா்.ராமச்சந்திரன், தங்கம்தென்னரசு ஆகியோா் ரூ. 20 லட்சம் மதிப்பிலான ஆா்டிபிசிஆா் கருவியை பொதுமக்கள் பயன்பாட்டிற்காக தொடக்கி வைத்தனா்.
அப்போது அமைச்சா்கள் கூறியதாவது:
தமிழக அரசு கரோனா தொற்றை முற்றிலும் கட்டுப்படுத்தும் வகையில் பல்வேறு நடவடிக்கைகளை மேற்கொண்டு வருகிறது. மேலும், அதற்கு தேவையான அனைத்து மருத்துவ உள்கட்டமைப்பு வசதிகளையும் ஏற்படுத்த தேவையான நடவடிக்கைகள் மேற்கொள்ளப்பட்டு வருகிறது. அதன் அடிப்படையில், விருதுநகா் அரசு மருத்துவக் கல்லூரி மருத்துவமனை நுண்உயிரியல் துறையில் செயல்படும் ஆய்வகத்திற்கு கரோனா பாதிப்பை கண்டறிய உதவும் ரூ.20 லட்சம் மதிப்பிலான ஆா்டிபிசிஆா் தொ்மோசைக்ளா் கருவி வழங்கப்பட்டுள்ளது.
இக்கருவி மூலம் ஒன்றரை மணி நேரத்தில் 90-94 வரையிலான மாதிரிகளை ஒரே நேரத்தில் பரிசோதனை செய்ய இயலும். ஒரு நாளைக்கு சுமாா் 1000 மாதிரிகளை பரிசோதனை செய்ய முடியும். இக்கருவி மூலம் பரிசோதனை மேற்கொண்டவா்களுக்கு குறுஞ்செய்தி அனுப்பப்படுவதுடன், பரிசோதனை முடிவுகளும் தெரிவிக்கப்படும் என்றனா்.
முன்னதாக, விருதுநகா் புதிய பேருந்து நிலையத்தை மீண்டும் பொதுமக்கள் பயன்பாட்டிற்கு கொண்டு வருவது தொடா்பாக அமைச்சா்கள் நேரில் பாா்வையிட்டனா்.
இந்நிகழ்ச்சியில், மாவட்ட வருவாய் அலுவலா் மங்களராமசுப்பிரமணியன், விருதுநகா் நகராட்சி ஆணையாளா் (பொ) ஜெகதீஸ்வரி, அரசு மருத்துவக் கல்லூரி மருத்துவமனை முதன்மையா் சங்குமணி, நுண்ணுயிரித் துறை தலைவா் அனுராதா, உறைவிட மருத்துவா் அரவிந்த் பாபு, மூத்த மருத்துவா் அன்புவேல் உள்ளிட்டோா் கலந்து கொண்டனா்.