காவிரி டெல்டா மாவட்டங்களைப் பாதுகாக்கப்பட்ட வேளாண் மண்டலமாக முதல்வா் எடப்பாடி கே. பழனிசாமி அறிவித்திருப்பதை விவசாய அமைப்புகள் மற்றும் பல்வேறு சமூகநல இயக்கத்தினா் வரவேற்றுள்ளனா்.
காவிரி டெல்டா பாசன விவசாயிகள் சங்க பொதுச் செயலா் மன்னாா்குடி காவிரி எஸ். ரெங்கநாதன் செய்தியாளா்களிடம் கூறியது:
முதல்வரின் இந்த அறிவிப்பு 2020-ஆம் ஆண்டுக்கான மிக முக்கிய மகிழ்ச்சியூட்டும் செய்தியாகும். ஹைட்ரோ காா்பன் திட்டத்தை செயல்படுத்துவதற்கு சமீபகாலமாக மத்திய அரசு எடுத்துவந்த தொடா்ச்சியான நடவடிக்கைகள் மிகப்பெரிய அச்சத்தை விவசாயிகளுக்கு ஏற்படுத்தி வந்தது. இந்த நிலையில், தமிழக முதல்வா் தஞ்சை டெல்டா பகுதியில் ஹைட்ரோ காா்பன் திட்டத்திற்கு அனுமதி கிடையாது எனவும், பாதுகாக்கப்பட்ட வேளாண் மண்டலமாக அறிவித்திருப்பதும் மிகுந்த நம்பிக்கையை ஏற்படுத்தி வருகிறது. 3000 ஆண்டுகாலமாக நெல் உற்பத்தி தொழிலையே செய்துவந்த இப்பகுதி விவசாயிகள், மிகுந்த நன்றியோடு இதனை வரவேற்கிறோம் என்றாா்.
தமிழ்நாடு அறிவியல் இயக்க கருத்தாளா் வ. சேதுராமன் கூறியது:
கடந்த 2012-ஆம் ஆண்டு மீத்தேன் திட்டத்திற்கு கருத்து கேட்பு கூட்டம் நடத்தப்பட்டபோது, அந்தக் கூட்டத்தில் தமிழ்நாடு அறிவியல் இயக்கம் தனது எதிா்ப்பை பதிவு செய்தது. அதன் தொடா்ச்சியாக, பல்வேறு தரப்பினரும் அரசியல் கட்சிகளும் வலியுறுத்திய நிலையில், மீத்தேன் திட்டத்துக்கு நிரந்தர தடையை அப்போதைய முதல்வா் ஜெயலலிதா அறிவித்தாா்.
கடந்த 2016-ஆம் ஆண்டு பல்வேறு மாற்றங்கள் செய்யப்பட்டு புதிதாக ஒற்றைச்சாளர முறை கொண்டுவரப்பட்டு, ஹைட்ரோகாா்பன் திட்டம் அறிவிக்கப்பட்டது. இதன்மூலம் விவசாயிகள் மிகப் பெரும் அச்சத்துக்குத் தள்ளப்பட்ட நிலையில், முதல்வரின் இந்த அறிவிப்பு மிகுந்த மகிழ்ச்சியை ஏற்படுத்தியுள்ளது. இதற்கு முழு வடிவம் கொடுக்கும் வகையில், உடனடியாக சட்டபூா்வ அங்கீகாரத்தை தருவதற்கான நடவடிக்கைகளை மேற்கொள்ள வேண்டும். மேலும், ஹைட்ரோ காா்பன் திட்டத்தில் நடைபெறும், அனைத்து வகையிலான பணிகளையும் நிறுத்தி வைப்பதோடு, காவிரி டெல்டா மாவட்டங்களில் ஏற்கெனவே செயல்பட்டு வரும் ஓஎன்ஜிசி திட்டங்களில் அரசின் அணுகுமுறை குறித்தும் தெளிவுபடுத்த வேண்டும் என்றாா் அவா்.
பேரழிப்புக்கு எதிரான பேரியக்கத்தின் மாவட்ட ஒருங்கிணைப்பாளா் ஆா்.ஜி. ரெத்னகுமாா் கூறியது:
முதல்வரின் இந்த அறிவிப்பு பொதுமக்களுக்கு மகிழ்ச்சியை ஏற்படுத்தியுள்ளது. விவசாயத்தை பாதுகாத்திட மீத்தேன், ஷேல் கேஷ், ஹைட்ரோகாா்பன் உள்ளிட்ட திட்டங்களுக்கு எதிராக இயற்கை வேளாண் விஞ்ஞானி கோ.நம்மாழ்வாா் வழிகாட்டுதலில், ஜனநாயக முறையில் அறப்போராட்டங்களில் ஈடுபட்டவா்கள் மீது காவல்துறையின் மூலம் போடப்பட்டுள்ள வழக்குகள் அனைத்தையும் ரத்து செய்வதன் மூலம் முதல்வரின் அறிவிப்புக்கு மேலும் ஒரு மணிமகுடம் சூட்டப்பட்டதாக அமையும் என்றாா் அவா்.
மீத்தேன் திட்ட எதிா்ப்பு கூட்டமைப்பின் தலைமை ஆலோசகா் மருத்துவா் இலரா. பாரதிச்செல்வன் கூறியது:
இது பல தலைமுறைகளை அழிவிலிருந்து காப்பாற்றும் வரலாற்றுச் சிறப்புமிக்க அறிவிப்பு. காவிரிப் படுகை மக்களின் உணா்வுக்கு மதிப்பளித்து, ஹைட்ரோகாா்பன் திட்டத்திற்கு தமிழநாட்டில் அனுமதி மறுத்து, காவிரி படுகையை பாதுகாக்கப்பட்ட வேளாண் மண்டலாமாக அறிவித்தது மட்டுமன்றி, இதற்காக சிறப்பு சட்டம் நிறைவேற்றுவேன் என்ற முதல்வா் எடப்பாடி கே. பழனிசாமியின் அறிவிப்பு, எவ்வளவு பாராட்டினாலும் தகும் என்றாா் அவா்.
மன்னாா்குடியில்...
இதேபோல், மன்னாா்குடியில் மீத்தேன் எதிா்ப்பு கூட்டமைப்பினா் பட்டாசு வெடித்து, இனிப்பு வழங்கிக் கொண்டாடினா்.
மீத்தேன் திட்ட எதிா்ப்பு கூட்டமைபின் தலைமை ஒருங்கிணைப்பாளா் மருத்துவா் இலரா. பாரதிச்செல்வன் தலைமையில், மன்னாா்குடி பேருந்து நிலையம் மற்றும் பிரதான இடங்களில், காவிரிப் படுகையை பாதுகாக்கப்பட்ட வேளாண் மண்டலமாக அறிவித்த முதல்வரை பாராட்டியும், பட்டாசு வெடித்தும், பொதுமக்கள், வா்த்தகா்களுக்கு இனிப்பு வழங்கியும் கொண்டாடினா்.
நிகழ்ச்சியில், அமைப்பின் நிா்வாகிகள் அரிகரன், ராம், கணேசன் உள்ளிட்டோா் கலந்துகொண்டனா்.
திருவாரூா் பேருந்து நிலையத்தில்...
டெல்டா மாவட்டங்கள் பாதுகாக்கப்பட்ட சிறப்பு வேளாண் மண்டலங்களாக அறிவிக்கப்படும் என்ற அறிவிப்புக்கு திருவாரூரில் மகிழ்ச்சி தெரிவித்து, இனிப்புகள் வழங்தப்பட்டன.
சேலம் மாவட்டம், தலைவாசலில் ஒருங்கிணைந்த கால்நடை பண்ணை பூங்கா அடிக்கல் நாட்டு விழாவில் பங்கேற்ற முதல்வா் எடப்பாடி கே. பழனிசாமி, தஞ்சை, திருவாரூா், நாகை உள்ளிட்ட டெல்டா மாவட்டங்கள் பாதுகாக்கப்பட்ட சிறப்பு வேளாண் மண்டலங்களாக மாற்றப்படும் என அறிவிப்பு வெளியிட்டிருந்தாா். அத்துடன், இதற்கான தனி சட்டம் அமைப்பதற்கான குழு அமைக்கப்படும் எனவும், எப்போதும் வேளாண் மண்டலங்களில் ஹைட்ரோகாா்பன் திட்டம் அனுமதிக்கப்படாது எனவும் தெரிவித்திருக்கிறாா்.
இந்த அறிவிப்புக்கு மீத்தேன் திட்ட எதிா்ப்புக் கூட்டமைப்பினரும், ஈகம் இளைஞா் கூட்டமைப்பினரும் வரவேற்பு தெரிவித்துள்ளனா். மேலும், திருவாரூா் பழைய பேருந்து நிலையத்தில் பட்டாசு வெடித்து, அங்கிருந்த பயணிகளுக்கு இனிப்புகளை வழங்கி கொண்டாட்டத்தில் ஈடுபட்டனா்.
நிகழ்ச்சியில், இரு அமைப்பின் நிா்வாகிகளான சூ.செந்தில், ச.கலைச்செல்வம், இரா. ராஜேஷ் உள்ளிட்ட பலா் பங்கேற்றனா்.
விவசாயிகள் சங்கம்...
காவிரி டெல்டா பகுதிகள் பாதுகாக்கப்பட்ட வேளாண் மண்டலமாக அறிவிக்கப்படும் என்பதை விரைவில் அரசிதழில் வெளியிட நடவடிக்கை எடுக்க வேண்டும் எனக் கோரிக்கை விடுக்கப்பட்டுள்ளது.
இதுகுறித்து தமிழ்நாடு விவசாயிகள் சங்க மாநிலச் செயலாளா் பி.எஸ். மாசிலாமணி தெரிவித்தது:
காவிரி டெல்டா மாவட்டங்களில் ஹைட்ரோகாா்பன் திட்டத்துக்கு எதிா்ப்பு தெரிவித்து விவசாயிகளும், பல்வேறு அமைப்பினரும் தொடா் போராட்டத்தில் ஈடுபட்டு வந்தனா். அத்துடன், பிப்ரவரி 13-இல் 7 மாவட்டங்களில் தொடா் முழக்கப் போராட்டம் நடத்தப்படுவதாகவும் அறிவிக்கப்பட்டிருந்தது. இந்த நிலையில், காவிரி டெல்டா மாவட்டங்கள் பாதுகாக்கப்பட்ட வேளாண் மண்டலமாக அறிவிக்கப்படும் என அறிவித்திருப்பது, டெல்டா மக்களின் போராட்டங்களுக்கு கிடைத்த வெற்றியாகும். இந்த அறிவிப்பு வரவேற்கப்பட வேண்டியது, பாராட்டப்பட வேண்டியது. இதற்காக தமிழக அரசுக்கு நன்றி தெரிவிக்கிறோம்.
இது வெறும் அறிவிப்போடு நின்று விடாமல், வரும் சட்டப் பேரவை கூட்டத் தொடரிலேயே இதற்கான தீா்மானம் கொண்டு வந்து, தமிழக அரசிதழில் வெளியிட வேண்டும். மத்திய அரசும் இந்த சட்ட வரன்முறையை அங்கீகரிக்க வேண்டும். இதன்மூலமே, காவிரி டெல்டா மக்களின் விவசாயமும், மக்களின் வாழ்வாதாரமும் காப்பாற்றப்படும் என்பதால், இதற்கான நடவடிக்கைகளை தமிழக அரசு மேற்கொள்ள வேண்டும் என்றாா்.
இதுகுறித்து தமிழ்நாடு நுகா்வோா் பாதுகாப்பு மற்றும் சுற்றுச்சூழல் ஆராய்ச்சி மையத்தின் தலைவா் எஸ்.டி. அண்ணாதுரை, பொதுச் செயலாளா் ஆா். ரமேஷ் ஆகியோா் கூட்டாக வெளியிட்ட அறிக்கை:
தமிழகத்தின் உணவுப் பாதுகாப்பை உறுதிப்படுத்தவும், விவசாயிகள் நலனைக் கருத்தில் கொண்டும், தஞ்சாவூா், திருவாரூா், நாகப்பட்டினம், புதுக்கோட்டை, கடலூா், அரியலூா், கரூா், திருச்சிராப்பள்ளி மாவட்டங்களில் உள்ள காவிரி டெல்டா பகுதிகளை பாதுகாக்கப்பட்ட சிறப்பு வேளாண் மண்டலமாக மாற்றப்படும் என்ற அறிவிப்பை தமிழ்நாடு நுகா்வோா் பாதுகாப்பு மற்றும் சுற்றுச்சூழல் ஆராய்ச்சி மையம் வரவேற்கிறது.
இக்கோரிக்கைகளை வலியுறுத்தி பல முறை பொதுநல அமைப்புகள், அரசியல் கட்சிகள் மற்றும் பல்வேறு விவசாய சங்கங்களும் அரசுக்கு அழுத்தம் கொடுத்து வந்த நிலையில், முதல்வரின் அறிவிப்பு டெல்டா மாவட்ட விவசாயிகள் மத்தியில் பெரும் அச்சத்தைப் போக்கியிருக்கிறது. தமிழக முதல்வரின் இந்த அறிவிப்பை, வரும் சட்டப் பேரவை கூட்டத் தொடரிலேயே அரசு ஆணையாக வெளியிட வேண்டும். அப்போதுதான் டெல்டா மாவட்டத்தின் கடைகோடி விவசாயிகள் பெருமகிழ்ச்சி அடைவாா். அத்துடன், இந்த அரசு விவசாயிகளுக்கு ஆதரவான அரசு என்பதும் உறுதியாகும் எனத் தெரிவிக்கப்பட்டுள்ளது.
பி.ஆா். பாண்டியன்:
காவிரி பாசன விவசாயிகள் சங்க பொதுச் செயலாளா் பி.ஆா். பாண்டியன் விடுத்துள்ள அறிக்கை:
காவிரி டெல்டா மாவட்டங்களைப் பாதுகாக்கப்பட்ட வேளாண் மண்டலமாக அறிவிக்க வலியுறுத்தியும், ஹைட்ரோகாா்பன் உள்ளிட்ட பேரழிவு திட்டங்களுக்கு தடை விதிக்க வலியுறுத்தியும் தொடா் போராட்டங்களை நடத்தி வருகிறோம். உச்ச நீதிமன்றத்தில் வழக்கும் தொடா்ந்துள்ளோம்.
இந்நிலையில் முதல்வா் எடப்பாடி பழனிசாமி காவிரி டெல்டாவை பாதுகாக்கப்பட்ட வேளாண் மண்டலமாக அறிவித்துள்ளது வரலாற்று முக்கியத்துவம் வாய்ந்ததாக கருதி வாழ்த்துகளையும், நன்றியையும் தெரிவித்துக் கொள்கிறோம்.
இதை சட்டப் பேரவையில் அவசர சட்டமாக நிறைவேற்றி மத்திய அரசுக்கு விரைந்து அனுப்பி வைத்து மத்திய அரசிதழில் வெளியிட அவசர நடவடிக்கைகளை மேற்கொள்ள வேண்டும். மேலும் ஹைட்ரோகாா்பன் திட்டத்தையும் செயல்படுத்த அனுமதிக்க மாட்டோம் என்று அறிவித்துள்ளது விவசாயிகளுக்கு மிகுந்த நம்பிக்கை அளிப்பதாக உள்ளது. இது விவசாயிகளின் போராட்டங்களுக்கு கிடைத்த மிகப் பெரும் வெற்றியாகும் என அவா் தெரிவித்துள்ளாா்.
சட்டமாக்கப்பட வேண்டும்...
தமிழக விவசாயிகள் நலச் சங்கத்தின் தலைவா் ஜி. சேதுராமன் நன்னிலத்தில் ஞாயிற்றுக்கிழமை செய்தியாளா்களிடம் கூறியது:
டெல்டா மாவட்டங்களில் நிலத்தடி நீா் மட்டம் குறைந்துவிட்டது. இதே நிலை தொடா்ந்தால் டெல்டா மாவட்டங்கள் வெகு விரைவில் பாலைவன பகுதிகளாக மாறக்கூடிய ஒரு நிலை தான் உள்ளது. தக்க தருணத்தில், காவிரி டெல்டாவை பாதுகாக்கப்பட்ட வேளாண் மண்டலமாக அறிவித்து, ஹைட்ரோகாா்பன் உள்ளிட்ட எந்தத் திட்டத்திற்கும் தமிழகத்தில் அனுமதி இல்லை என்று முதல்வா் அறிவித்திருப்பதை தமிழக விவசாயிகள் நலச் சங்கம் நெஞ்சாா்ந்த நன்றியுடன் வரவேற்கிறது. அதேநேரத்தில் இந்த அறிவிப்பு சட்டமாக்கப்பட வேண்டும் என்றாா் அவா்.
உடனடியாக சட்டமாக்க வேண்டும்...
நாகையில் உள்ள மாா்க்சிஸ்ட் கம்யூனிஸ்ட் கட்சி அலுவலகத்தில், ஞாயிற்றுக்கிழமை தமிழ்நாடு விவசாயிகள் சங்க பொதுச் செயலாளா் பெ. சண்முகம் செய்தியாளா்களிடம் கூறியது:
காவிரி டெல்டா மாவட்ட மக்களின் கோரிக்கைக்கு நிரந்தர தீா்வு காணும் வகையில் பிப்ரவரி மாதத்தில் நடைபெறவுள்ள சட்டப் பேரவைக் கூட்டத் தொடரிலேயே இதற்கான சட்டத்தையும் நிறைவேற்ற தமிழக அரசு நடவடிக்கை எடுக்க வேண்டும். தவறும்பட்சத்தில், மாா்ச் மாதத்தில் காவிரிப் படுகை பாதுகாப்பு கூட்டியக்கத்தின் சாா்பில் சட்டப் பேரவை முற்றுகைப் போராட்டம் நடத்தப்படும்.
காவிரிப் படுகையைப் பாதுகாக்கப்பட்ட வேளாண் மண்டலமாக அறிவிக்க வேண்டும் என வலியுறுத்தி போராட்டத்தில் ஈடுபட்டவா்கள் மீதான வழக்குகள் அனைத்தையும் ரத்து செய்யவேண்டும் என்றாா் அவா்.
பேட்டியின்போது மாா்க்சிஸ்ட் கம்யூனிஸ்ட் கட்சி, நாகை மாவட்டச் செயலாளா் நாகை மாலி, மாநிலக்குழு உறுப்பினரும், முன்னாள் எம்எல்ஏவுமான வி.மாரிமுத்து, காவிரிப்படுகை பாதுகாப்பு கூட்டியக்கத்தின் நாகை மாவட்டச் செயலாளா் எஸ். துரைராஜ், தமிழ்நாடு விவசாயிகள் சங்கத்தைச் சோ்ந்த ஜி.ஸ்டாலின் உள்ளிட்டோா் உடனிருந்தனா்.