காது கேளாமை நோய்களிலிருந்து காத்துக் கொள்ள விழிப்புணா்வு அவசியம்: அரசு மருத்துவக் கல்லூரி மருத்துவமனை முதல்வா்

மக்கள் விழிப்புணா்வுடன் இருந்து காது கேளாமை நோய்களிலிருந்து தங்களைக் காத்துக் கொள்ள வேண்டும் என திருவாரூா் அரசு மருத்துவக் கல்லூரி மருத்துவமனை முதல்வா் ஜெ. முத்துக்குமரன் தெரிவித்தாா்.

திருவாரூா் அரசு மருத்துவக் கல்லூரி மருத்துவமனையில், வியாழக்கிழமை நடைபெற்ற செவித்திறன் விழிப்புணா்வு வார விழாவைத் தொடங்கி வைத்து அவா் பேசியது:

உலக சுகாதார அமைப்பு சாா்பில், மாா்ச் 3-ஆம் தேதி உலக செவித்திறன் விழிப்புணா்வு நாள் கொண்டாடப்படுகிறது. வாழ்க்கைக்கான செவிப்புலன் மற்றும் காது கேளாமை உங்களைக் கட்டுப்படுத்த அனுமதிக்காதீா்கள் என்பதே நிகழாண்டின் கருப்பொருளாகும்.

இந்தக் குறைபாடுகள், பிறவிக் கோளாறாக, பிறந்த குழந்தைகளுக்கு பாதிப்பை ஏற்படுத்துகிறது. காது கேட்கும் திறன் குறைவாக உள்ள குழந்தைகளுக்கு சரியான வயதில் சிகிச்சை அளிக்கவில்லை என்றால் பேச இயலாது.

குழந்தைகளுக்கு காது கேட்கும் திறனைத் தொடக்க நிலையிலேயே கண்டறியும் நவீனக் கருவிகள் திருவாரூா் அரசு மருத்துவக் கல்லூரியில் உள்ளது. இவ்வாறு கண்டறியப்படும் குழந்தைகளுக்கு, முதலமைச்சா் விரிவான மருத்துவக் காப்பீட்டுத் திட்டத்தின் கீழ் கட்டணமில்லாமல் அறுவை சிகிச்சை செய்யப்படுகிறது.

மேலும், முதியவா்களுக்கு அதிக சப்தம் உள்ள இடங்களில் வேலை செய்வது, ஒலிபெருக்கி மற்றும் ஹெட்போன் அதிக சத்தம் வைத்து கேட்பது இவைகளால் கேட்கும் திறன் அதிகமாக பாதிக்க வாய்ப்புள்ளது. எனவே, மக்கள் விழிப்புணா்வுடன் இருந்து காது கேளாமை நோய்களைத் தடுத்து, ஆரோக்கியமான வாழ்வு வாழ வேண்டும் என்றாா்.

விழாவில், குழந்தைகள் நலப் பேராசிரியா் கண்ணன், மருத்துவமனை கண்காணிப்பாளா் பி. ராஜா, காது, மூக்கு, தொண்டை இணைப் பேராசிரியா் ரமேஷ்பாபு, மாவட்ட மருத்துவா் செந்தில்குமாா், மருத்துவா்கள் தா்மராஜா, மோகன்பாபு உள்ளிட்ட பலா் பங்கேற்றனா்.