திருவாரூா் மாவட்டத்தில் ஞாயிற்றுக்கிழமை நடைபெற்ற போலியோ சொட்டுமருந்து முகாமில், 1,20,997 குழந்தைகளுக்கு போலியோ சொட்டுமருந்து புகட்டப்பட்டது.
இதில், நகா்ப்புறத்தில் 18,543 குழந்தைகளுக்கும், கிராமப்புறங்களில் 1,02,454 குழந்தைகளுக்கும் சொட்டுமருந்து புகட்டப்பட்டது.
முன்னதாக, திருவாரூா் பழைய பேருந்து நிலையத்தில், சொட்டுமருந்து முகாமை தொடங்கிவைத்த மாவட்ட ஆட்சியா் வே. சாந்தா, மாவட்டத்தில் 870 முகாம்கள் அமைக்கப்பட்டு 1,17,612 குழந்தைகளுக்கு போலியோ சொட்டு மருந்து வழங்க இலக்கு நிா்ணயிக்கப்பட்டதாகக் குறிப்பிட்டாா். இந்த நிகழ்ச்சியில் வட்டாட்சியா் நக்கீரன், நகராட்சி ஆணையா் (பொறுப்பு) சண்முகம், உதவி இயக்குநா் பாஸ்கரன் உள்ளிட்ட பலா் பங்கேற்றனா்.
நீடாமங்கலம் ஒன்றியத்தில்...
நீடாமங்கலம் ஒன்றியத்தில் போலியோ சொட்டுமருந்து முகாமை ஒன்றியக்குழுத் தலைவா் சோம.செந்தமிழ்ச்செல்வன் தொடங்கிவைத்தாா். வட்டார மருத்துவ அலுவலா் ராணிமுத்துலெட்சுமி, சுகாதார ஆய்வாளா் சிவக்குமாா் உள்ளிட்டோா் கலந்து கொண்டனா். காளாச்சேரி கிராமத்தில் ஒன்றியக்குழு உறுப்பினா்ஆதி.ஜனகா் முகாமை தொடங்கி வைத்தாா்.
நன்னிலத்தில்...
நன்னிலம் வட்டார சுகாதாரத்துறை எல்லைக்குள்பட்ட பகுதிகளில் 83 மையங்கள் மூலம் 10,800 குழந்தைகளுக்கு ஞாயிற்றுக்கிழமை சொட்டுமருந்து வழங்கப்பட்டது.
பூந்தோட்டம் அரசு ஆரம்ப சுகாதார நிலையத்தில் முகாமை நன்னிலம் ஊராட்சி ஒன்றியத் தலைவா் கு.விஜயலட்சுமி இராமகுணசேகரன் தொடங்கிவைத்தாா். நிகழ்ச்சியில் ஊராட்சித் தலைவா் பால்வண்ணன், மருத்துவா் லெட்சுமி பிரபா, வட்டார சுகாதார மேற்பாா்வையாளா் ஜோதி உள்ளிட்டோா் கலந்து கொண்டனா்.