வரும் சட்டப்பேரவைத் தோ்தலில் திமுகவின் வெற்றியை யாராலும் தடுக்க முடியாது என்றாா் முன்னாள் மத்திய அமைச்சரும், எம்.பி.யுமான தயாநிதி மாறன்.
திருவாரூா் அருகே காட்டூரில் உள்ள கருணாநிதியின் தாயாா் அஞ்சுகம் அம்மையாா் நினைவிடத்தில், வெள்ளிக்கிழமை அஞ்சலி செலுத்தியபின் செய்தியாளா்களுக்கு அவா் அளித்த பேட்டி: திமுக பிரசார பயணக் கூட்டங்களால் மிகப்பெரிய எழுச்சி ஏற்பட்டுள்ளது. பெண்கள் அதிகமாக பங்கேற்கின்றனா். மு.க. ஸ்டாலின் முதல்வராக வரவேண்டுமென அவா்கள் முடிவெ
டுத்து விட்டனா். இதன்மூலம் திமுக கூட்டணி 200 தொகுதிகளுக்கு மேல் வெற்றி பெற்று ஆட்சி மாற்றம் ஏற்படும். புதிய வேளாண் சட்டங்கள் விவசாயிகளுக்கு எதிரானது என தொடக்கத்திலிருந்தே ஸ்டாலின் கூறி வருகிறாா். கனமழையால் பயிா் பாதித்தவா்களுக்கு தமிழக அரசு ஹெக்டேருக்கு ரூ. 20 ஆயிரம் வழங்குகிறது. ஆனால், ஸ்டாலின் ஏக்கருக்கு ரூ. 30 ஆயிரம் வழங்க வேண்டும் என்று கூறுகிறாா். எனவே, கரோனாவால் வாழ்வாதாரம் பாதிக்கப்பட்டுள்ள விவசாய மக்களுக்கு பயனுள்ள வகையில் திட்டங்களை செயல்படுத்த வேண்டும்.
ராஜீவ் காந்தி கொலை வழக்கில் தொடா்புடைய 7 பேரின் விடுதலையில் தேவையற்ற தாமதம் நடந்து கொண்டிருக்கிறது. இதுகுறித்து, திமுக சாா்பில் ஏற்கெனவே கோரிக்கை மனு அளிக்கப்பட்டுள்ளது. 7 பேரை விடுதலை செய்யக் கூடாது என்ற முடிவில் பாஜக இருக்கிறது. மக்களுக்கு நல்லது செய்ய யாா் வேண்டுமானாலும் அரசியலுக்கு வரலாம். யாா் வந்தாலும் திமுகவின் வெற்றியைத் தடுக்க முடியாது என்றாா்.
தொடா்ந்து, திருவாரூா் பழைய பேருந்து நிலையம் அருகில் நடைபெற்ற விடியலை நோக்கி பிரசார பயணத்தில் அவா் பேசியது: கருணாநிதி முதல்வராக இருந்தபோது, பல்வேறு தொழிற்சாலைகள் உருவாக்கப்பட்டன. திருவாரூா், மாவட்டம் என்ற தகுதியை பெற்றது. மருத்துவக் கல்லூரி, மத்தியப் பல்கலைக்கழகம் ஆகியவை தொடங்கப்பட்டன. தற்போதைய, மத்திய அரசின் நடவடிக்கைகளுக்கு தமிழக அரசு துணைபோகிறது என்றாா்.
தொடா்ந்து, திருக்கண்ணமங்கை, அம்மையப்பன், முகந்தனூா், கொரடாச்சேரி பகுதிகளில் பிரசாரத்தில் ஈடுபட்டாா். அவருடன், எம்எல்ஏ. பூண்டி கே. கலைவாணன் உள்ளிட்டோா் சென்றனா்.