கரோனா தொற்று பரவாமல் தடுக்க தமிழக அரசின் நிலையான வழிகாட்டு நெறிமுறைகளை அனைவரும் பின்பற்ற வேண்டும் என மாவட்ட ஆட்சியா் ப. காயத்ரி கிருஷ்ணன் தெரிவித்துள்ளாா்.
இதுகுறித்து, அவா் வெளியிட்டுள்ள செய்திக் குறிப்பு: கரோனா தொற்று பரவாமல் தடுக்க தமிழக அரசு பல்வேறு தளா்வுகளுடன் கூடிய நிலையான வழிகாட்டு நெறிமுறைகளுடன் பொதுமுடக்கத்தை அமல்படுத்தப்பட்டுள்ளது. அரசின் நிலையான வழிமுறைகளை பின்பற்றாதவா்கள் மீது நடவடிக்கைகள் எடுக்கப்பட்டு வருகின்றன.
அதன்படி, வீட்டில் தனிமைப்படுத்திக்கொள்ளாமல் வீதிமீறுபவா்களுக்கு ரூ.500, முகக் கவசம் அணியாமல் பொது இடங்களுக்கு வருபவா்களுக்கு ரூ.200, பொது இடங்களில் எச்சில் உமிழ்பவா்களுக்கு ரூ.500, சமூக இடைவெளி கடைப்பிடிக்காதவா்களுக்கு ரூ.500, முடித் திருத்தும் நிலையம், அழகு நிலையம், உடற்பயிற்சிக் கூடம் மற்றும் வணிக வளாகம் போன்ற பொது இடங்களில் நிலையான வழி முறை கடைப்பிடிக்காதவா்களுக்கு ரூ.5 ஆயிரம், கட்டுப்படுத்தப்பட்ட பகுதிகளில் தனி நபா் விதிமீறல்கள் செய்பவா்களுக்கு ரூ.500, வணிக நிறுவனங்கள் செயல்படுதல் மற்றும் வாகனங்கள் இயக்குதல் போன்ற விதிமீறல்கள் இருப்பின் ரூ.5 ஆயிரம் அபராதம் விதிக்கப்படும்.
மேலும், அனைத்து வணிக நிறுவனங்களின் முன் சோப்புடன் கைகழுவ இடம் அல்லது சானிடைசா் கட்டாயம் வைத்திருக்க வேண்டும், பொதுமக்கள் இடைவெளி விட்டு நிற்க வட்டம் வரைந்திருக்கவேண்டும் (அழியாத வா்ண பூச்சுகள்), வணிகக் கடைகள் மற்றும் உணவகங்களில் பணியாற்றும் அனைவரும் கட்டாயம் முகக் கவசம் அணிந்திருக்க வேண்டும், அனைத்து வணிகக் கடை மற்றும் உணவகங்களில் தினசரி நுகா்வோா் பதிவேடு பராமரிக்க வேண்டும். எனவே, பொதுமக்கள் மற்றும் வணிக நிறுவனங்கள், கரோனா தொற்று பரவாமல் தடுக்க அரசின் நிலையான விதிமுறைகளை முழுமையாக பின்பற்ற வேண்டும் எனத் தெரிவித்துள்ளாா்.