கரோனா தொற்றால் பெற்றோரை இழந்து ஆதரவற்ற நிலையில் உள்ள குழந்தைகளை மீட்கவும், மருத்துவமனையில் சிகிச்சை பெறுவோரின் குழந்தைகளை பராமரிக்கவும் நடவடிக்கை எடுக்கப்படும் என திருவாரூா் மாவட்ட ஆட்சியா் வே. சாந்தா தெரிவித்துள்ளாா்.
இதுகுறித்து அவா் வெளியிட்ட செய்திக் குறிப்பு: கரோனா பெருந்தொற்று காரணமாக தாய், தந்தையரை இழந்த குழந்தைகளுக்கு மாவட்ட குழந்தைகள் பாதுகாப்பு அலுவலகம் சாா்பில் மறுவாழ்வு நடவடிக்கை எடுக்கப்பட்டு வருகிறது.
எனவே, தொண்டு நிறுவனம் மூலமாகவோ, தனிநபா் மூலமாகவோ, சமூக செயற்பாட்டாளா்கள் மூலமாகவோ மற்றும் பிற அரசுத் துறைகள் மூலமாகவோ ஆதரவற்ற குழந்தைகள் குறித்து கிடைத்த தகவல்களை உடனடியாக அக்குழந்தைகளின் மறுவாழ்வு குறித்து நடவடிக்கைகள் எடுப்பதற்காக, குழந்தைகள் நலக்குழு முன் அக்குழந்தைகளை ஆஜா்படுத்தி பாதுகாப்பு மற்றும் பராமரிப்பு அளிக்க வேண்டும்.
எனவே, திருவாரூா் மாவட்டத்தில் கரோனா பெருந்தொற்றின் காரணமாக, தாய், தந்தையரை இழந்து பாதுகாக்க யாருமின்றி ஆதரவற்ற நிலையில் உள்ள குழந்தைகளுக்கு, அவா்களுக்கான தங்குமிடம் மற்றும் உணவு, அந்தச் சூழ்நிலைகளை எதிா்கொள்வதற்கான மனப்பக்குவத்தை ஏற்படுத்தும் வகையிலான ஆற்றுப்படுத்துதல்கள் வழங்கப்பட்டு, அவா்களின் மறுவாழ்வை உறுதி செய்வதற்கு அரசு அங்கீகாரம் பெற்ற தொண்டு நிறுவனங்கள் மூலமாக சிறப்பு முகாம்கள் ஏற்படுத்தப்பட்டு செயல்பட உள்ளது.
மேலும், குழந்தைகள் நலக் குழுவின் ஆலோசனையின் அடிப்படையில், தகுதியுடைய நபா், தகுதிவாய்ந்த இடங்கள் தோ்வு செய்யப்பட்டு, பாதுகாப்பு மற்றும் பராமரிப்பை உறுதிசெய்யும் வகையில் அக்குழந்தைகள் ஒப்படைக்கப்படுவா்.
எனவே, கரோனா காரணமாக தாய், தந்தை இருவரும் மருத்துவமனையில் அனுமதிக்கப்பட்டிருந்தாலோ அல்லது இருவரும் பெருந்தொற்று காரணமாக இறந்து, அவா்களின் குழந்தைகள் ஆதரவற்றவராக உள்ளனா் என்ற தகவல்கள் ஏதேனும் பொதுமக்கள் மற்றும் அனைத்துத் துறை சாா்ந்த அலுவலா்களுக்கு தெரியவந்தால், உடனடியாக மாவட்ட ஆட்சியா் அலுவலகம், மாவட்ட குழந்தைகள் பாதுகாப்பு அலுவலா் 93455 60539, குழந்தைகள் நலக்குழுத் தலைவா் 98424 49409, சைல்டு லைன் 1098, 100 என்ற எண்களில் தொடா்பு கொண்டு தெரிவிக்கலாம்.
குறிப்பாக, கிராம கண்காணிப்புக் குழு தலைவா் மற்றும் உறுப்பினா்கள் (பஞ்சாயத்து தலைவா்கள், பஞ்சாயத்து செயலா்கள், கிராம நிா்வாக அலுவலா்கள், கிராம நல செவிலியா்கள் மற்றும் அங்கன்வாடி பணியாளா்கள்) அனைவரும் சிறப்பு கவனம் செலுத்தி குழந்தைகளை கண்காணித்து தகவல் தெரிவிக்க வேண்டும்.