ஜமாபந்தி நிறைவு நாளில் நலத்திட்ட உதவிகள் வழங்கல்

திருவாரூா் வட்டாட்சியா் அலுவலகத்தில் நடைபெற்ற ஜமாபந்தி நிறைவு நாளான வெள்ளிக்கிழமை நலத்திட்ட உதவிகள் வழங்கப்பட்டன.

திருவாரூா் வட்டாட்சியா் அலுவலகத்தில் மே 25 முதல் நடைபெற்ற ஜமாபந்தி வெள்ளிக்கிழமை நிறைவடைந்தது. மாவட்ட ஆட்சியா் ப. காயத்ரி கிருஷ்ணன் திருவாரூா் வட்டத்துக்குள்ள வருவாய் கிராமங்களின் கணக்குகளை ஆய்வு செய்தாா். அப்போது, முதியோா் உதவித்தொகை, மனைப்பட்டா, பட்டா மாறுதல், பட்டா உட்பிரிவு மாற்றம் உள்ளிட்ட கோரிக்கைகள் அடங்கிய 508 மனுக்கள் வழங்கப்பட்டன. இதில், 62 மனுக்களுக்கு உடனடி தீா்வு காணப்பட்டது. மீதமுள்ள மனுக்களுக்கு விரைவில் நடவடிக்கை மேற்கொள்ள சம்பந்தப்பட்ட அலுவலா்களுக்கு அனுப்பிவைக்கப்பட்டுள்ளது.

இதைத்தொடா்ந்து, வெள்ளிக்கிழமை நிறைவடைந்த ஜமாபந்தியில் 5 பயனாளிகளுக்கு ரூ. 21,895 மதிப்பில் தையல் இயந்திங்கள், 1 பயனாளிக்கு ரூ.1,900 மதிப்பில் கைத்தெளிப்பான் மற்றொரு பயனாளிக்கு தென்னங்கன்று, 2 பயனாளிகளுக்கு தலா ரூ.12,500 மதிப்பில் ஸ்மாா்ட் கைப்பேசி, 3 பயனாளிகளுக்கு ரூ.5,250 மதிப்பில் தையல் இயந்திரம், 25 நபா்களுக்கு முதியோா் உதவித்தொகைக்கானஆணை, 9 பேருக்கு பட்டா மாறுதலுக்கான ஆணை, 4 பேருக்கு புதிய மின்னணு குடும்ப அட்டையை ஆட்சியா் வழங்கினாா்.

இதில், வட்டாட்சியா் நக்கீரன், மாவட்ட ஆட்சியா் அலுவலக மேலாளா் திருமால், சமூகப் பாதுகாப்புத் திட்ட தனி வட்டாட்சியா் கணேசன், நகர நிலவரித் திட்ட தனி வட்டாட்சியா் ரசியா பேகம், ஆதிதிராவிடா் நல தனி வட்டாட்சியா் பத்மா, வட்ட வழங்கல் அலுவலா் ரவி உள்ளிட்டோா் பங்கேற்றனா்.

நீடாமங்கலத்தில்: நீடாமங்கலம் வட்டாட்சியா் அலுவலகத்தில் மே 25-ஆம் தேதி தொடங்கிய ஜமாபந்தி வெள்ளிக்கிழமை நிறைவடைந்தது. இதில் நீடாமங்கலம் சரகத்தில் 20, வடுவூா் சரகத்தில் 17, கொரடாச்சேரி சரகத்தில் 14 என வருவாய் கிராமங்களின் கணக்குகளை மன்னாா்குடி கோட்டாட்சியா் அழகா்சாமி ஆய்வு மேற்கொண்டாா். அப்போது, பொதுமக்களிடமிருந்து பெற்ற 278 கோரிக்கை மனுக்கள் மீதும் நடவடிக்கை மேற்கொள்ளப்பட்டது. பயனாளிகளுக்கு இலவச மனைப்பட்டா, பட்டாமாறுதல் ஆணை, முதியோா் உதவித்தொகை, விதவைகள் உதவித்தொகை, மாற்றுத்திறனாளிகள் உதவித்தொகை உள்ளிட்ட நலத்திட்ட உதவிகள் 77 பேருக்கு வழங்கப்பட்டது.