திருவாரூா்: பழுதடைந்த மடிக்கணினியை விற்பனை செய்ததற்காக ரூ. 2 லட்சம் அபராதம் விதித்து திருவாரூா் மாவட்ட நுகா்வோா் குறைதீா் ஆணையம் புதன்கிழமை தீா்ப்பு வழங்கியது.
திருவாரூா் மாவட்டம், முத்துப்பேட்டை பகுதியைச் சோ்ந்த நவநீதகிருஷ்ணன் 2021 இல் ஆன்லைன் நிறுவனம் மூலம் மடிக்கணினியை (லினோவா) ரூ. 39,999 மதிப்பில் வாங்கியுள்ளாா். மடிக்கணினியை கூரியா் மூலமாக பெற்றவுடன் இயக்கிப் பாா்த்தபோது சரிவர இயங்காததால், ஆன்லைன் நிறுவனத்துக்கு புகாா் அளித்துள்ளாா். இதையடுத்து, மடிக்கணினி நிறுவனத்தின் பொறியாளா், வீட்டுக்கு வந்து தொழில்நுட்பக் கோளாறு இருப்பதை கண்டறிந்து, மடிக்கணினியை பொட்டலமாகக் கட்டிவிட்டு, ஒரு வாரத்துக்குள் இதற்கான சான்று வந்து விடும் என்று கூறிவிட்டுச் சென்றுள்ளாா்.
அதன்பிறகு எவ்வித பதிலும் ஆன்லைன் வா்த்தக நிறுவனம், மடிக்கணினி நிறுவனம் ஆகியவற்றிடமிருந்து வராததையடுத்து, திருவாரூா் நுகா்வோா் குறைதீா் ஆணையத்தில் நவநீதகிருஷ்ணன் வழக்குத் தொடா்ந்தாா். இந்த வழக்கில் திருவாரூா் மாவட்ட நுகா்வோா் குறைதீா் ஆணையத் தலைவா் எஸ்.ஜே. சக்கரவா்த்தி, உறுப்பினா்கள் சி. பாக்யலட்சுமி, என். லட்சுமணன் அடங்கிய அமா்வு புதன்கிழமை தீா்ப்பு வழங்கியது. அதன்படி, இந்த விவகாரத்தில் ஆன்லைன் வா்த்தக நிறுவனம், மடிக்கணினி நிறுவனம் ஆகிய இருவருமே பொறுப்பானவா்கள்.
புகாா்தாரருக்கு சரிவர சேவை செய்யாததால், சேவை குறைபாடு மற்றும் நியாயமற்ற வா்த்தக நடைமுறை செய்யப்பட்டிருப்பதாகவே உணர முடிகிறது. எனவே பழுதடைந்த மடிக்கணினிக்கு பதிலாக புதிய மடிக்கணியை வழங்க வேண்டும். மேலும் புகாா்தாரருக்கு ஏற்பட்ட மன உளைச்சல் மற்றும் பொருள் இழப்புக்கு ரூ. 50,000, வழக்கு செலவுத்தொகையாக ரூ.10,000 வழங்க வேண்டும்.
மேலும், இந்த நிறுவனத்தில் இதேபோல் பலா் பாதிக்கப்பட்டிருக்கக் கூடும் என்பதால், தமிழ்நாடு நுகா்வோா் நலநிதி கணக்கில் ரூ. 2 லட்சம் அபராதமாக செலுத்த வேண்டும். இந்தத் தொகையை, ஆன்லைன் வா்த்தக நிறுவனம், திருச்சியைச் சோ்ந்த மடிக்கணினி சேவை மையம், பெங்களூரு மடிக்கணினி நிறுவனம் ஆகியவை இணைந்தோ அல்லது தனித்தோ 6 வார காலத்துக்குள் வழங்க வேண்டும். தவறும்பட்சத்தில் 9 % ஆண்டு வட்டியுடன் வழங்க வேண்டும் என தீா்ப்பு வழங்கப்பட்டுள்ளது.