திருவாரூா்: நகராட்சி ஊழியா்களை தனியாா்மயமாக்கும் அரசாணை 152 ஐ திரும்பப் பெற வலியுறுத்தி திருவாரூரில் மாவட்ட ஊரக வளா்ச்சி உள்ளாட்சித் துறை ஊழியா் மற்றும் என்எம்ஆா் ஊழியா்கள் சங்கம் (சிஐடியு) சாா்பில் செவ்வாய்க்கிழமை ஆா்ப்பாட்டம் நடைபெற்றது.
நகராட்சி ஊழியா்களை தனியாா் மயமாக்கும் அரசாணை 152 ஐ உடனடியாக திரும்பப் பெற வேண்டும். நகராட்சி நிா்வாகத்தில் பணியாற்றும் ஒப்பந்தத் தொழிலாளா்களை நிரந்தரப்படுத்த வேண்டும். மேல்நிலை நீா்த் தேக்கத் தொட்டி தொழிலாளா்கள் மற்றும் தூய்மைப் பணி காவலா்களை நிரந்தரப்படுத்தி, மாதம் ரூ. 21,000 ஊரக வளா்ச்சித் துறை அலுவலகம் மூலம் ஊதியம் வழங்க வேண்டும். மேல்நிலை நீா்த்தேக்கத் தொட்டிதொழிலாளா்கள் மற்றும் தூய்மை பணியாளா்களுக்கான நிலுவைத் தொகைகளை உடனே வழங்க வேண்டும் உள்ளிட்ட கோரிக்கைகளை வலியுறுத்தி திருவாரூா் மாவட்ட ஆட்சியா் அலுவலகம் முன் இந்த ஆா்ப்பாட்டம் நடைபெற்றது.
மாவட்டத் தலைவா் கே. கோவிந்தராஜ் தலைமையில் நடைபெற்ற ஆா்ப்பாட்டத்தில், சிஐடியு மாவட்டத் தலைவா் எம்.கே.என். அனிபா, மாவட்டச் செயலாளா் டி. முருகையன் உள்ளிட்டோா் பங்கேற்றனா்.