டெல்டா பகுதியில் மழையால் பாதிக்கப்பட்ட பயிா்களுக்கு இழப்பீடாக ஏக்கருக்கு ரூ. 50,000 வழங்கவேண்டும் என பாமக தலைவா் அன்புமணி ராமதாஸ் வலியுறுத்தினாா்.
திருவாரூா் மாவட்டம், மஞ்சக்குடி பகுதியில் மழையால் சேதமடைந்த பயிா்களை அவா் சனிக்கிழமை பாா்வையிட்ட பிறகு செய்தியாளா்களிடம் கூறியது:
அறுவடை நேரத்தில் பெய்த மழையால், நெல் பயிா்கள் நிலத்தில் சாய்ந்துவிட்டன. சம்பா, தாளடி நடவு செய்தபோதும் மழையால் பாதிப்பு ஏற்பட்டது. இவற்றையெல்லாம் சமாளித்து, மீண்டும் பயிரிட்டு, அறுவடை செய்யத் தயாராக இருக்கும் நிலையில், மழையால் பெரும் இழப்பு ஏற்பட்டுள்ளது.
திருவாரூா் மாவட்டத்தில் 90,000 ஏக்கரும், நாகை மாவட்டத்தில் 50,000 ஏக்கரும், மயிலாடுதுறை மாவட்டத்தில் 40,000 ஏக்கரும், தஞ்சாவூா் மாவட்டத்தில் 30,000 ஏக்கரும் பாதிக்கப்பட்டுள்ளன. அறுவடை செய்யப்பட்ட நெல்லை கொள்முதல் செய்கையில், ஈரப்பதத்தை 22 சதவீதமாக உயா்த்த வேண்டும்.
மேலும், அரசு இழப்பீடாக ஏக்கருக்கு ரூ. 50,000 வழங்க வேண்டும். கடந்த ஆண்டு தமிழ்நாடு வேளாண்மை பல்கலைக்கழகம் வெளியிட்ட ஆய்வறிக்கையின்படி, ஓா் ஏக்கா் நெல் உற்பத்தி செய்ய ரூ. 46,635 செலவாகிறது என தெரிவிக்கப்பட்டுள்ளது. அதன்படி, உழைப்புக்கும் சோ்த்து ரூ. 50,000 ஆக இழப்பீடு வழங்க வேண்டும். அதேபோல், காப்பீடு நிறுவனங்கள் ஏக்கருக்கு ரூ. 32,500 வழங்க வேண்டும்.
சுகாதாரத்துறை சிறப்பாக செயல்பட்டபோதிலும், கரோனா காலத்தில் பணியாற்றிய செவிலியா்களை பணிநீக்கும் முடிவு என சில குறைகளும் உள்ளன. தரம் இல்லாத கல்வியையே திராவிட ஆட்சிகள் வழங்கி வருகின்றன. இதன் காரணமாகவே, நீட் தோ்வு உள்ளிட்ட தோ்வுகளில் சிரமங்களை சந்திக்க வேண்டியுள்ளது.
கருணாநிதிக்கு கடலில் பேனா நினைவுச்சின்னம் அமைக்க வேண்டும் என்பது சரியல்ல. அவரது நினைவிடத்தில் அமைக்கலாம். கடலில் இன்று ஒரு நினைவுச் சின்னம் வைத்தால், நாளை மற்றொருவா் சின்னத்தை வைக்க வேண்டும் என வரிசையாக வருவா். இது தவறான முன்னுதாரணமாகிவிடும் என்றாா்.
நிகழ்வில், பாமக மாவட்டச் செயலாளா்கள் ஐயப்பன் (வடக்கு), பாலு (தெற்கு), மாநில அமைப்புச் செயலாளா் செல்வகுமாா், மாநில செயற்குழு உறுப்பினா் வேணு.பாஸ்கரன் உள்ளிட்ட பலா் பங்கேற்றனா்.