புகையிலை தடை நீக்க தீா்ப்புக்கு எதிராக மேல்முறையீடு செய்ய ஆலோசனை

புகையிலைப் பொருள்களுக்கான உயா்நீதிமன்றத்தின் தடை நீக்க தீா்ப்புக்கு எதிராக மேல்முறையீடு செய்ய ஆலோசனை மேற்கொள்ளப்பட்டு வருவதாக தமிழக மருத்துவம் மற்றும் மக்கள் நல்வாழ்வுத் துறை அமைச்சா் மா. சுப்பிரமணியன் தெரிவித்தாா்.

திருவாரூா் அரசு மருத்துவக் கல்லூரி மருத்துவமனையில் ரூ. 20 கோடியில் 50 படுக்கை வசதியுடன் கட்டப்படவுள்ள தீவிர சிகிச்சை பிரிவுக்கான கட்டுமானப் பணிகளுக்கு வெள்ளிக்கிழமை நடைபெற்ற அடிக்கல் நாட்டும் நிகழ்ச்சியில் பங்கேற்ற பின் அவா்கூறியது:

அரசு மருத்துவக் கல்லூரி மருத்துவமனைகளுக்கு ரூ. 4 கோடியில் கேத்லாப் கருவி கொள்முதல் செய்யும் பணி நடைபெற்று வருகிறது. ரூ.13 லட்சத்தில் கூடுதலாக10 டயாலிசிஸ் இயந்திரங்கள் வாங்க நடவடிக்கை எடுக்கப்பட்டுள்ளன. கொரடாச்சேரி பகுதியில் புதிய அரசு ஆரம்ப சுகாதார நிலையம் கட்டும் பணிக்கான ஆணை வழங்கப்பட்டுள்ளது. மன்னாா்குடி, திருவாரூா் பகுதிகளில் நகா்ப்புற நலவாழ்வு மையங்கள் கட்டும் பணிகள் நிறைவு பெற்றவுடன் முதல்வா் திறந்து வைக்க உள்ளாா்.

திருவாரூா் மாவட்டத்தில் மொத்தம் 24 கட்டடங்கள், 22 துணை சுகாதார நிலையங்கள் கட்டும் பணிகள் ரூ.5 கோடியில் தொடங்கப்பட்டுள்ளன. அனைவருக்குமான மருத்துவ சேவையில் திருவாரூா் மாவட்டம் தன்னிறைவு பெறுகிறது.

எய்ம்ஸ் மருத்துவமனைக்கு 2019-இல் அடிக்கல் நாட்டப்பட்ட பிறகு, சுற்றுச்சுவா் மட்டுமே எழுப்பப்பட்டுள்ளது. சுமாா் 242 ஏக்கா் நிலம் கையகப்படுத்தப்பட்டுள்ளது. இதுவரை 10-க்கும் மேற்பட்ட முறை மத்திய அமைச்சரை சந்தித்து எய்ம்ஸ் கட்டுமானப் பணிகளை விரைந்து முடிக்க வேண்டும் என தொடா்ந்து கேட்டுக்கொண்டிருக்கிறோம். இதே காலகட்டத்தில் தொடங்கப்பட்ட எய்ம்ஸ் மருத்துவமனைகளின் கட்டுமானப் பணிகள் நாடு முழுவதும் வேகமாக நடைபெற்று வருகின்றன.

எம்ஆா்பி மூலம் நிரப்பப்படும் பணியிடங்கள் அனைத்தும் நிரந்தர பணியிடங்களே. 4,308 பணியிடங்கள் நிரப்புவதற்கான நடவடிக்கைகள் மேற்கொள்ளப்பட்டு, கடந்த வாரம் 130 மருத்துவா்களுக்கான பணிநியமன ஆணைகள் வழங்கப்பட்டுள்ளன. மேலும் 1,021 மருத்துவா்களுக்கான சான்றிதழ் சரிபாா்ப்புப் பணிகள் முடிவடைந்துள்ளன.

உயா்நீதிமன்றம் பான் மசாலா, குட்கா போன்ற புகையிலைப் பொருள் தடைச் சட்டத்துக்கு எதிராக வழங்கிய தீா்ப்பை எதிா்த்து மேல்முறையீடு செய்ய சட்ட வல்லுநா்களுடன் ஆலோசிக்கப்பட்டு வருகிறது என்றாா்.

நமக்கு நாமே திட்டத்தின் கீழ் ரூ. 10 லட்சத்தில் மருத்துவக் கல்லூரி மாணவ, மாணவியா் விடுதியில் நவீன சமையலறைக் கூடத்தையும், மருத்துவக் கல்லூரியில் பயிலும் மாணவா்களுக்கிடையே மருதம் எனும் தலைப்பில் மாணவா் மன்றத்தையும் அமைச்சா் திறந்து வைத்தாா்.

மாவட்ட ஆட்சியா் ப. காயத்ரி கிருஷ்ணன் தலைமை தாங்கினாா். நாகை எம்பி எம். செல்வராஜ், தமிழ்நாடு தாட்கோ தலைவா் உ. மதிவாணன், சட்டப்பேரவை உறுப்பினா்கள் பூண்டி கே. கலைவாணன் (திருவாரூா்), க. மாரிமுத்து (திருத்துறைப்பூண்டி), மாவட்ட ஊராட்சித் தலைவா் கோ. பாலசுப்ரமணியன், அரசு மருத்துவக் கல்லூரி முதல்வா் ஜோசப்ராஜ் உள்ளிட்டோா் பங்கேற்றனா்.