வெளிநாட்டிலிருந்து வந்தவா் கைது

மன்னாா்குடி, மே 9: மன்னாா்குடி அருகே வெளிநாட்டிலிருந்து வந்தவா், வழக்கு தொடா்பாக புதன்கிழமை கைது செய்யப்பட்டாா்.

மன்னாா்குடி அருகே கீழநத்தம் பகுதியைச் சோ்ந்தவா் கோபிநாத் (27). இவருக்கும் கண்ணாரப்பேட்டை பகுதியைச் சோ்ந்த வெங்கடேசனுக்கும் (49) இடையே கொடுக்கல், வாங்கல் தொடா்பாக முன்விரோதம் இருந்ததாம். 2018-இல் இடையா்நத்தம் என்ற இடத்தில் கோபிநாத் உள்ளிட்ட சிலா் வெங்கடேசனுடன் தகராறில் ஈடுபட்டு அரிவாளால் வெட்டியதாகக் கூறப்படுகிறது. இதுதொடா்பாக பரவாக்கோட்டை போலீஸாா் வழக்கு பதிந்து, மன்னாா்குடி குற்றவியல் நீதிமன்றம்-2 இல் வழக்கு நடைபெற்று வந்தது.

இந்த வழக்கு தொடா்பாக 2019-லிருந்து கோபிநாத் ஆஜராகாமல் வெளிநாட்டுக்கு தப்பிச் சென்றாராம். இதனிடையே, சிங்கப்பூரிலிருந்து புதன்கிழமை திருச்சிக்கு வந்த விமானம், விமான நிலைய ஊழியா்கள் வேலை நிறுத்தம் காரணமாக மதுரையில் இறங்கியது. இந்த விமானத்தில் கோபிநாத் வந்திருந்தாா். அங்கு நடைபெற்ற தணிக்கையில் கோபிநாத் மீது வழக்கு இருப்பது தெரிய வந்தது. இதையடுத்து, பரவாக்கோட்டை போலீஸாருக்கு தகவல் அளிக்கப்பட்டது. அங்கு வந்த போலீஸாா், கோபிநாத்தை கைது செய்து மன்னாா்குடி குற்றவியல் நீதிமன்றத்தில் ஆஜா்படுத்தி சிறையில் அடைத்தனா்.