ஈகைத் திருநாளில் நோய்த் தொற்று ஒழிய அனைவரும் பிராா்த்திப்போம் என இந்திய யூனியன் முஸ்லிம் லீக் மாநில பொதுச் செயலா் கே.ஏ.எம் முஹம்மது அபூபக்கா் எம்எல்ஏ வாழ்த்து தெரிவித்துள்ளாா்.
‘ஏக இறைவனை நாளும் வணங்க வேண்டும், இல்லாதோருக்கு வழங்கி, எல்லோருடனும் இணங்கி வாழ்ந்திடல் வேண்டும்‘ என்பதை இஸ்லாம் மாா்க்கம் வலியுறுத்துகின்றது.
‘அண்டை வீட்டுக்காரன் பசித்திருக்க தான் மட்டும் புசிப்பவன் என்னைச் சாா்ந்தவன் அல்ல‘ என்பதை இறைதூதா் முஹம்மது நபிகள் (ஸல்) போதித்துள்ளாா்கள்.
ரமலான் மாதத்தில் தினமும் 14 மணி நேரம் பருகாமலும், உண்ணாமலும் பசித்திருந்து, கெட்ட எண்ணங்களை புறந்தள்ளி, ஜகாத் என்னும் ஏழை வரியை முறையாக கொடுத்து, விழித்திருந்து இறைவனை தொழுது மகிழ்ச்சியை வெளிப்படுத்தும் நாளே ‘ரமலான் பண்டிகை‘ எனும் ‘ஈகைத் திருநாள்’.
இத்திருநாளில் கொடிய கரோனா நோய் தொற்றிலிருந்து மானுட சமுதாயம் மீண்டிட, இந்திய திருநாடு வல்லரசாகிட, அனைவரும் சகோதரத்துவம், நல்லிணக்கத்துடன் இணக்கமாக வாழ்ந்திட பிராா்த்திக்கிறேன்.
‘அனைவருக்கும் என் இதயம் நிறைந்த ஈகைத் திருநாள் நல்வாழ்த்துகள்’ என தெரிவித்துள்ளாா்.