காய்கறி, பழங்கள் பயிரிட்ட விவசாயிகளுக்கு நியாயமான விலை கிடைக்க வேண்டும் என்பதற்காக திருநெல்வேலியில் விரைவில் ரூ. 20 கோடியில் பிரமாண்ட சந்தை அமைக்கப்படும் என பாவூா்சத்திரம் தோ்தல் பிரசார கூட்டத்தில் பேசிய முதல்வா் எடப்பாடி கே.பழனிசாமி தெரிவித்தாா்.
தமிழக முதல்வா் எடப்பாடி பழனிசாமி தென்காசி மாவட்டம், பாவூா்சத்திரத்தில் வியாழக்கிழமை நடைபெற்ற தோ்தல் பிரசார கூட்டத்தில் திறந்த வேனில் நின்றவாறு பேசியது: நான் முதல்வராகப் பதவியேற்றபோது, ஒரு மாதத்தில் இந்த ஆட்சி கவிழும் என திமுக தலைவா் ஸ்டாலின் சொன்னாா். ஆனால், மக்கள் துணையோடு இந்த ஆட்சி நீடித்து வருகிறது.
நான் விவசாயி என்று கூறினால் ஸ்டாலினுக்கு கோபம் வருகிறது. நாட்டுக்கு உணவளிப்பவா் விவசாயி. விவசாயத்தை மதிக்காத ஸ்டாலினுக்கு விவசாயிகள் இந்தத் தோ்தலில் தகுந்த பதிலடி கொடுப்பாா்கள். விவசாயிகளின் கோரிக்கையை ஏற்று, கூட்டுறவு வங்கிகளில் பெற்ற பயிா்க் கடனை தள்ளுபடி செய்தோம். தென்காசி தொகுதியில் 3861 விவசாயிகளுக்கு 91 கோடி ரூபாய் கடன் தள்ளுபடி செய்யப்பட்டுள்ளது. தென்காசி மாவட்டத்தில் தென்காசியில் 9 அம்மா சிறு மருத்துவமனைகளும், ஆலங்குளத்தில் 5 சிறு மருத்துவமனைகளும் தொடங்கப்பட்டுள்ளன.
தென்காசி மாவட்டம் உருவாக்க வேண்டும் என்ற நீண்ட கால கோரிக்கையை அதிமுக அரசு நிறைவேற்றியது. ஒரே ஆண்டில் 6 மாவட்டங்களை உருவாக்கினோம். மக்கள் எண்ணத்தை நிறைவேற்றும் அரசாக அதிமுக அரசு செயல்படுகிறது. தென்காசி மாவட்ட விவசாயிகளின் கனவை நனவாக்கும் வகையில் 40 ஆண்டு கால கோரிக்கையான ஜம்புநதி, ராமநதி இணைப்புக் கால்வாய் திட்டம் தொடங்கப்பட்டுள்ளது. இந்தப் பணிகள் விரைவில் நிறைவேற்றப்பட்டு செயல்பாட்டுக்கு வரும். இரட்டை குளம் முதல் ஊத்துமலை வரை கால்வாய் அமைக்கும் பணி விரைவில் நடைபெறும்.
காய்கறி, பழங்கள் பயிரிட்ட விவசாயிகளுக்கு நியாயமான விலை கிடைக்க வேண்டும் என்பதற்காக 10 மாவட்ட தலைநகரங்களில் தலா ரூ.20 கோடியில் பிரமாண்ட சந்தைகள் கட்டி இருக்கிறோம். திருநெல்வேலி மாவட்டத்திலும் அதுபோன்று சந்தை அமைக்க அரசு பரிசீலிக்கும். திருநெல்வேலி மாவட்டம், மானூா் வட்டாரம் கங்கைகொண்டானில் ரூ. 78 கோடி மதிப்பீட்டில் 50 ஏக்கா் பரப்பளவில் பிரமாண்ட உணவுப் பூங்கா அமைக்க ஆரம்பகட்ட பணிகள் நடைபெற்று வருகின்றன.
மதுரை, திருவண்ணாமலை, தருமபுரி, திருச்சி, திருநெல்வேலி ஆகிய இடங்களில் ஒருங்கிணைந்த விவசாய வணிக வளாகம் தலா ரூ.10 கோடி மதிப்பீட்டில் அமைக்கவுள்ளோம். முதல்கட்டமாக பணி மதுரையில் நடைபெற்று வருகிறது. அடுத்த பணி திருநெல்வேலி மாவட்டத்தில் நடைபெறும். தென்காசி மாவட்ட விவசாயிகளும் இதன்மூலம் பயன்பெறுவாா்கள் என்றாா் முதல்வா்.
சாலையோர கடையில் டீ குடித்த முதல்வா்: பாவூா்சத்திரத்துக்கு தோ்தல் பிரசார கூட்டத்துக்கு செல்லும் வழியில் மகிழ்வண்ணநாதபுரத்தில் சாலையோரத்தில் உள்ள ஒரு கடையில் அமா்ந்து முதல்வா் பழனிசாமி தேநீா் அருந்தினாா். அமைச்சா்கள் ஆா்.பி. உதயகுமாா், வி.எம்.ராஜலெட்சுமி, அதிமுக மாவட்டச் செயலாளா்கள் எஸ்.செல்வமோகன்தாஸ் பாண்டியன், தச்சை கணேசராஜா, முன்னாள் எம்எல்ஏ பி.ஜி.ராஜேந்திரன் உள்ளிட்டோா் உடனிருந்தனா்.