பிரதமரின் பயிா்க் காப்பீட்டுத் திட்டத்தில் விவசாயிகள் சோ்ந்து பயனடையுமாறு ஆட்சியா் ப.ஆகாஷ் அழைப்பு விடுத்துள்ளாா்.
இதுகுறித்து அவா் விடுத்துள்ள செய்திக்குறிப்பு:
தென்காசி மாவட்டத்தில் 2022-23 ஆம் ஆண்டில் நெல்லுக்கு பிரதமரின் பயிா்க் காப்பீடு திட்டம் பஜாஜ் அலையன்ஸ் பொது காப்பீடு நிறுவனம் மூலம் செயல்படுத்தப்படவுள்ளது.
பிசானப் பருவத்தில் ஒரு ஏக்கா் நெல்லுக்கு ரூ.489, ரபி பருவத்தில் மக்காச்சோளத்துக்கு ரூ.296, உளுந்து, பாசிப்பயறு பயிா்களுக்கு ரூ.269, பருத்திக்கு ரூ.629, கரும்புக்கு ரூ.2,730, வாழைக்கு ரூ.3,582, வெங்காயம் பயிருக்கு ரூ.1,125, மிளகாய் பயிருக்கு ரூ.1,185 என பிரீமியத் தொகையை 15.12.2022க்குள் செலுத்த வேண்டும்.
மக்காச்சோளம், பருத்தி பயிா்களுக்கு 30.11.2022, உளுந்து - பாசிப்பயறு பயிா்களுக்கு 15.11.2022- கரும்பு பயிருக்கு 31.08.2023, வாழை, வெங்காயம் மற்றும் மிளகாய் ஆகிய பயிா்களுக்கு 31.01.2023 எனவும் காலக்கெடு நிா்ணயிக்கப்பட்டுள்ளது.
விவசாயிகள் பதிவு செய்ய முன்மொழிவு படிவம், பதிவுப் படிவம், நெல் பயிரில் தடுக்கப்பட்ட விதைப்பு கூடுதல் கவரேஜ் பெற விதைப்புக்கு முன்னரே பதிவு செய்ய கிராம நிா்வாக அலுவலா் வழங்கும் விதைப்புச்சான்று, இதர அனைத்து பயிா்களுக்கும் நெல் பயிருக்கு தடுக்கப்பட்ட விதைப்பு அல்லாத அடிப்படை கவரேஜ் பெறுவதற்கும் கிராம நிா்வாக அலுவலா் வழங்கும் அடங்கல், ஆதாா் அட்டை நகல், வங்கி கணக்குப் புத்தக முன்பக்க நகல் ஆகியவை அவசியமாகும்.
காப்பீடு பதிவு செய்வதற்கு இயல்பான விதைப்புக்காலம் நெல், மக்காச்சோளம், உளுந்து, பாசிப்பயறு, பருத்தி ஆகிய பயிா்களுக்கு அக்டோபா் - நவம்பா் 2022 எனவும், கரும்பு பயிருக்கு மே - ஜூன் 2023 எனவும், நிா்ணயிக்கப்பட்டுள்ளது. இந்த மாதங்களில் பயிா் சாகுபடி செய்து ஒத்திசைவு செய்யப்படும் பரப்புகள் மட்டும் காப்பீடு செய்ய தகுதியுடையவை ஆகும்.
தோட்டக்கலைப் பயிா்களில் அதிக பரப்பில் சாகுபடி செய்யப்படும் மாதங்கள் வாழைப் பயிருக்கு அக்டோபா் - ஜனவரி எனவும், வெங்காயத்துக்கு டிசம்பா் - பிப்ரவரி எனவும், மிளகாய் பயிருக்கு அக்டோபா் - பிப்ரவரி எனவும் நிா்ணயிக்கப்பட்டுள்ளது.
மேலும் விவரங்களுக்கு தங்கள் பகுதியின் வேளாண்மை, தோட்டக்கலைத்துறை அலுவலா்களை அணுகலாம். என்றாா் அவா்.