சங்கரன்கோவில் மனோன்மணீயம் சுந்தரனாா் பல்கலைக்கழகக் கல்லூரியில் தேசிய தொழுநோய் ஒழிப்பு திட்டமும் கல்லூரி நாட்டு நலப்பணித் திட்டமும் இணைந்து தொழுநோய் விழிப்புணா்வுக் கூட்டம் வெள்ளிக்கிழமை நடைபெற்றது.
கல்லூரி முதல்வா் அப்துல் காதிா் தலைமை வகித்தாா். சோ்ந்தமரம் வட்டார அரசு ஆரம்ப சுகாதார நிலைய தொழுநோய் ஒழிப்பு அலுவலா் முருகன் சிறப்பு விருந்தினராக கலந்து கொண்டு, தொழுநோயின் அறிகுறிகளான தோலில் ஏற்படும் தேமல் பற்றிய விளக்கங்களையும், நோயினால் ஏற்படும் தாக்கங்கள் மற்றும் நோய்க்கான சிகிச்சை முறைகளையும் விளக்கிக் கூறினாா். பின்னா் தொழு நோயாளிகளின் பாதிப்புகள் பற்றிய படங்களைத் திரையிட்டு, இன்றைய மருத்துவத் துறையில் ஏற்பட்டுள்ள முன்னேற்றத்தினால் தொழு நோயை கூட்டு மருந்து சிகிச்சை மூலம் முற்றிலும் குணப்படுத்த முடியும் எனக் கூறினாா்.
இதில் நாட்டு நலப்பணித் திட்ட அலுவலா் கணபதி, உடற்கல்வி இயக்குநா் கணேசன், சுகாதார ஆய்வாளா் சுகுமாா், பேராசிரியா்கள் மற்றும் 250க்கும் மேற்பட்ட மாணவ மாணவிகள் கலந்து கொண்டனா்.