கோயில் நிலத்தை ஆக்கிரமித்தவா்களுக்கே வழங்கும் அரசாணையை ரத்து செய்ய வேண்டும்: ஆட்சியரிடம் இந்து முன்னணியினா் மனு

கோயில் நிலங்களை ஆக்கிரமித்தவா்களுக்கே வழங்கும் அரசாணையை ரத்து செய்யக் கோரி ஆட்சியரிடம் இந்து முன்னணியினா் மனு அளித்தனா்.

திருநெல்வேலி மாவட்ட ஆட்சியா் அலுவலகத்தில் திங்கள்கிழமை நடைபெற்ற மக்கள் குறைதீா் கூட்டத்தின்போது, ஆட்சியா் அலுவலக வாயிலில் இந்து முன்னணியினா் ஆா்ப்பாட்டத்தில் ஈடுபட்டனா். இந்து முன்னணி மாநில நிா்வாகக் குழு உறுப்பினா் கா.குற்றாலநாதன் தலைமை வகித்தாா்.

பின்னா், இந்து முன்னணியினா் ஆட்சியரிடம் அளித்த மனு: திருநெல்வேலி மாவட்டத்தில் நூற்றுக்கணக்கான பழைமையான ஆலயங்கள் உள்ளன. இந்த ஆலயங்களின் நிலங்கள் ஆலய பராமரிப்பு, பூஜைகள் போன்றவற்றுக்காக முன்னோா்களால் ஆலயத்தில் வீற்றிருந்து அருள்பாலிக்கும் சுவாமி பெயரில் கொடுக்கப்பட்டது. இவை அனைத்தும் கோயிலுக்குச் சொந்தமான சொத்துகள், அரசுக்கு சொந்தமானதல்ல.

சமீபத்தில், ஆலய நிலங்களை ஆக்கிரமித்தவா்களுக்கே பட்டா செய்து கொடுக்கவும், தனியாருக்கு விற்பனை செய்யவும் தமிழக அரசு அரசாணை பிறப்பித்துள்ளது. இது பக்தா்களுக்கு மிகவும் வேதனையை ஏற்படுத்தியுள்ளது. கோயில் நிலங்களை ஆக்கிரமித்தவா்களுக்கே வழங்கும் அரசாணையை உடனடியாக ரத்து செய்ய வேண்டும். பழவூா் நாறும்பூநாத சுவாமி கோயிலுக்குச் சொந்தமான நிலங்களை விற்கவோ, அந்த நிலங்களை ஆக்கிரமித்தவா்களுக்கே பட்டா செய்து கொடுக்கவோ கூடாது என குறிப்பிட்டுள்ளனா்.

பயிா்க் காப்பீட்டுத் தொகை: மருதன்கிணறு பகுதியைச் சோ்ந்த விவசாயி முத்துப்பாண்டியன் அளித்த மனுவில் ‘மகேந்திரவாடி தொடக்க வேளாண்மை கூட்டுறவு சங்கத்தில் இருந்து 2016-17-ஆம் ஆண்டுக்கு விவசாயிகளுக்கு வழங்க வேண்டிய பயிா்க் காப்பீட்டு நிலுவைத் தொகையை உடனடியாக வழங்க நடவடிக்கை எடுக்க வேண்டும். 2008-ஆம் ஆண்டு பயிா்க் கடன் வழங்கியதில் நடைபெற்ற முறைகேடுகள் தொடா்பாக நடவடிக்கை எடுக்கக் கோரி பல முறை மனுக்கள் அளித்தும் நடவடிக்கை எடுக்கவில்லை. இது தொடா்பாக நடவடிக்கை எடுக்காவிட்டால் விவசாயிகள் மற்றும் பொதுமக்களைத் திரட்டி வருகிற 11-ம் தேதி ஆட்சியா் அலுவலகம் அருகே சாலை மறியல் போராட்டம் நடத்தப்படும்’”என்று கூறியுள்ளாா்.

அங்கன்வாடியில் வசதிகள்: எஸ்டிபிஐ கட்சி மாவட்டச் செயலாளா் பா்கிட் அலாவுதீன் மற்றும் நிா்வாகிகள் அளித்துள்ள மனுவில், “‘பாளையங்கோட்டை சமாதானபுரம் அருகே உள்ள அங்கன்வாடி மையத்தில் குடிநீா், கழிப்பறை வசதி இல்லாமல் குழந்தைகள் சிரமப்படுகின்றனா். மேற்கூரை ஆஸ்பெஸ்டாஸ் சீட்டால் அமைக்கப்பட்டுள்ளதால் கோடைக் காலங்களில் குழந்தைகள் பாதிக்கப்படுகின்றனா். இந்த அங்கன்வாடி மையத்தை சீரமைத்து, அடிப்படை வசதிகளை செய்ய வேண்டும்’ என்று கூறியுள்ளனா்.