திருநெல்வேலி மாவட்டம், ஆலங்குளம் அருகே தண்ணீர் தேடி ஊருக்குள் புகுந்த மான்களை நாய்கள் கடித்துக் குதறியதில் 4 மான்கள் உயிரிழந்தன.
சுப்பையாபுரம் பகுதியில் இருந்து செவ்வாய்க்கிழமை இரவு கூட்டமாக இரை தேடியும், தண்ணீர் தேடியும் மான்கள் நெட்டூர், வடக்கு கிடாரகுளம் கிராமங்களுக்குள் வந்துள்ளன. அவ்வாறு, வடக்கு கிடாரகுளம் பகுதிக்கு கூட்டமாக வந்த 7 மான்களை 40-க்கும் அதிகமான நாய்கள் சுற்றிவளைத்து கடித்துக்குதறின.
சப்தம் கேட்டு வந்த கிராம மக்கள், நாய்களிடம் இருந்து மான்களை மீட்கப் போராடினர். எனினும், 3 மான்கள் அந்த இடத்திலேயே இறந்தன. தப்பியோடிய 4 மான்களை நாய்கள் விரட்டிச் சென்று வீராணம் அருகே ஒரு மானை கடித்துக்கொன்றன.
தகவல் அறிந்து வனக் காப்பாளர்கள் கோவில்பாண்டி, தசரதராமன் ஆகியோர் சென்று இறந்த மான்களை கைப்பற்றினர். கால்நடை மருத்துவர்கள் ராம்செல்வம், சந்திரன் ஆகியோர் இறந்த மான்களை பரிசோதனை செய்தனர். இதில், 3 கர்ப்பிணி மான்கள் என தெரியவந்தது.
மலைப் பகுதிகளில் மான்கள் தண்ணீர் குடிப்பதற்காக வைக்கப்பட்டுள்ள தொட்டிகளைப் பராமரித்து தண்ணீர் நிரப்பி வைத்தால், இதுபோல மான்கள் ஊருக்குள் வந்து உயிரிழப்பதைத் தவிர்க்கலாம் என்பதோடு, மான்கள் விவசாய நிலங்களை பாழாக்குவதையும் தடுக்கலாம் என விவசாயிகள் கூறுகின்றனர்.