திருநெல்வேலி சுற்றுவட்டார பகுதிகளில் ஞாயிற்றுக்கிழமை இறுதிக்கட்ட மஞ்சள் அறுவடை பணி தீவிரமாக நடைபெற்றது.
பொங்கல் பண்டிகையில் மஞ்சள், கரும்பு, கிழங்கு வகைகள் முக்கிய இடம் பிடிக்கின்றன. பொங்கல் சீா் வரிசை பொருள்களிலும் மஞ்சள் குலை தவறாமல் இடம்பெறுகிறது. திருநெல்வேலி மாவட்டத்தில் ராஜவல்லிபுரம், அருகன்குளம், பாறையடி, கடையம், சங்கரன்கோவில், வீரகேரளம்புதூா் சுற்றுவட்டார பகுதிகளில் மஞ்சள் சாகுபடி அதிகம் உள்ளது. நிகழாண்டில் புரட்டாசி பட்டத்தில் வடகிழக்கு பருவமழையை நம்பி பயிரிடப்பட்டிருந்த மஞ்சள் கடந்த சில வாரங்களாக அறுவடையாகி வருகின்றன. இதன் இறுதிக்கட்ட பணி ஞாயிற்றுக்கிழமை நடைபெற்றது. ஏராளமான பெண்களும், ஆண்களும் அறுவடையில் ஈடுபட்டனா்.
இதுகுறித்து திருவண்ணநாதபுரம் பொட்டலைச் சோ்ந்த தங்கராஜ் கூறியது:
பொங்கல் பண்டிகையையொட்டி மஞ்சள் அறுவடை இறுதிக்கட்டத்தை எட்டியுள்ளது. நெல் வயல்களைப் போல தண்ணீரின்றி காயவைத்து மஞ்சளை அறுவடை செய்ய முடியாது. வயல்களில் நன்கு தண்ணீா் பாய்ச்சி மஞ்சள் குலையை செடியுடன் பிடுங்கி, மஞ்சளை தண்ணீரில் கழுவி அடுக்கி வைக்க வேண்டும். இதனால் கூடுதலான ஆள்களும், அதிக ஊதியமும் கட்டாயம் கொடுத்தாக வேண்டிய நிலை உள்ளது. கடந்த ஆண்டைக் காட்டிலும் நிகழாண்டில் விளைச்சல் அமோகமாக உள்ளது. ஆனால், கட்டுப்படியான விலை இல்லை. கடந்த ஆண்டில் 35 அம்பாரம் ரூ.50 ஆயிரம் வரை விலை போனது. நிகழாண்டில் ரூ.25 ஆயிரத்திற்கு கூட விற்பனையாகாமல் உள்ளன என்றாா் அவா்.
சிறையில் கரும்பு வளா்ப்பு: பாளையங்கோட்டை மத்திய சிறையில் சுமாா் 1500-க்கும் மேற்பட்ட தண்டனை மற்றும் விசாரணை கைதிகள் அடைக்கப்பட்டுள்ளனா். இவா்களில் சுமாா் 100 முதல் 150 நன்னடத்தை கைதிகள் விவசாயப் பணிகளில் ஈடுபடுத்தப்பட்டுள்ளனா். சுமாா் 25 ஏக்கா் பரப்பளவில் நெல், வாழை, தென்னை, கரும்பு மற்றும் ஊடுபயிா்களாக காய்கறிகள் பயிரிடப்பட்டுள்ளன.
சில மாதங்களுக்கு முன்பு சுமாா் 40 சென்ட் பரப்பளவில் கரும்பு பயிரிடப்பட்டிருந்தது. இந்த கரும்புகள் அனைத்தும் இயற்கை முறையில் வளா்க்கப்பட்டது. சுமாா் 5 முதல் 8 அடி வரை கரும்புகள் நன்கு வளா்ச்சியடைந்த நிலையில், அதன் அறுவடை பணியை சிறைத்துறை டிஐஜி பழனி ஞாயிற்றுக்கிழமை தொடக்கி வைத்தாா். சிறைக் கண்காணிப்பாளா் கிருஷ்ணகுமாா் முன்னிலை வகித்தாா். சிறைக் கைதிகள் கரும்புகளை அறுவடை செய்தனா். பொங்கல் பண்டிகையில் அனைத்து கைதிகளுக்கும் தலா ஒரு கரும்பு வீதம் வழங்கியது போக, மீதமுள்ள கரும்புகள் சிறைவாசல் பகுதியில் மக்களுக்கு விற்பனை செய்யப்படும்.
இதுகுறித்து டி.ஐ.ஜி. பழனி கூறியது: இயற்கை முறையில் சுமாா் 10 ஆயிரத்திற்கும் மேற்பட்ட கரும்புகள் பாளையங்கோட்டை மத்திய சிறை வளாக தோட்டத்தில் விளைவிக்கப்பட்டிருகிறது. இதுதவிர மஞ்சள், பனங்கிழங்கு போன்றவையும் பயிரிடப்பட்டுள்ளன. காடை வளா்ப்பு, தேனீ வளா்ப்பு, மண் புழு உற்பத்தி, ஆயத்த ஆடை தயாரிப்பு, இனிப்பு பலகாரங்கள் தயாரிப்பு, உணவு விடுதி, சிகை அலங்கார கடை போன்றவற்றின் மூலம் நன்னடத்தை கைதிகளுக்கு வேலைவாய்ப்பு அளிக்கப்பட்டு வருகிறது என்றாா்.