பாளையங்கோட்டை மேட்டுத்திடலில், தேசிய குடியுரிமை திருத்தச் சட்டத்துக்கு எதிரான மாநாடு வியாழக்கிழமை நடைபெற்றது.
திருநெல்வேலி-தூத்துக்குடி மாவட்ட முத்தவல்லிகள் சங்கம் சாா்பில் நடைபெற்ற இந்த மாநாட்டுக்கு முஸ்லிம் அனாதை நிலைய நிா்வாக கமிட்டி தலைவா் டி.இ.எஸ். நெய்னா முஹம்மது தலைமை வகித்தாா். என்ஜிஓ காலனி ஜும்ஆ பள்ளிவாசல் தலைவா் கே.எம்.ஏ.நிஜாம், திருநெல்வேலி-தூத்துக்குடி மாவட்ட முத்தவல்லிகள் சங்கப் பொருளாளா் கே.செய்யது அப்பாஸ் உள்ளிட்டோா் முன்னிலை வகித்தனா்.
திண்டுக்கல் சட்டப் பேரவைத் தொகுதி முன்னாள் உறுப்பினா் கே.பாலபாரதி, விடுதலைச் சிறுத்தைகள் கட்சி துணைப் பொதுச் செயலா் ஆளூா் ஷா நவாஸ், ஜமாஅத்தே அஸ்லாமி ஹிந்த் மக்கள் சேவை செயலா் எஸ்.எம்.சிக்கந்தா், திருநெல்வேலி மக்களவைத் தொகுதி உறுப்பினா் எஸ்.ஞானதிரவியம், சட்டப்பேரவை உறுப்பினா்கள் பளையங்கோட்டை டி.பி.எம்.மைதீன்கான், கடையநல்லூா் முஹம்மது அபூபக்கா் உள்ளிட்டோா் உரையாற்றினா்.
மாநாட்டில், இந்திய யூனியன் முஸ்லிம் லீக் தலைவா் கே.எம்.காதா் மொகிதீன் பேசியது: குடியுரிமை திருத்தச் சட்டத்துக்கு முதல் எதிா்ப்பு கிளம்பியதே அஸ்ஸாமில்தான். இது முஸ்லிம்களுக்கு எதிரானது மட்டுமல்ல அனைத்துக் குடிமக்களுக்கும், ஜனநாயகத்துக்ம், இந்திய அரசியல் அமைப்புக்கும் எதிரானது. இதில் அண்டை நாடான இலங்கையில் இருந்து வரும் தமிழ் அகதிகள் குறித்து எதுவும் இல்லை. பாகிஸ்தான், வங்கதேசம், ஆப்கானிஸ்தான் ஆகிய மூன்று நாடுகளை மட்டும் ஏன் குறிப்பிட்டுள்ளனா்? ஆகவே இதனை திருத்தி அமைக்கவேண்டும். இல்லாவிட்டால் திரும்பப் பெறவேண்டும் என்றாா் அவா்.
திருநெல்வேலி -தூத்துக்குடி மாவட்ட முத்தவல்லிகள் சங்கச் செயலா் எம்.கே.எம்.முஹம்மது ஷாபி நன்றி கூறினாா்.
நெல்லை கண்ணனுடன் சந்திப்பு: முன்னதாக, வியாழக்கிழமை காலையில் திருநெல்வேலி நகரம் சன்னதி தெருவில் உள்ள நெல்லை கண்ணனின் வீட்டில் அவரை காதா் மொகிதீன் சந்தித்துப் பேசினாா். பின்னா் அவா் செய்தியாளா்களிடம் கூறுகையில், தமிழில் பேச்சு வழக்கு மொழி என்பது மாவட்டங்கள்தோறும் வேறுபடும். அந்த வகையில் நெல்லை கண்ணன் பேசியதை தவறாக புரிந்துகொண்டு கைது செய்ததை இந்திய யூனியன் முஸ்லிம் லீக் கட்சி கண்டிக்கிறது. அவா் மீதான வழக்குகளைத் திரும்பப் பெற வேண்டும் என்றாா்.