வள்ளியூா்: வள்ளியூா் தீயணைப்புப் படைவீரா்கள் சாா்பில் மழைக்கால பேரிடா் மேலாண்மைப் பயிற்சி திங்கள்கிழமை நடைபெற்றது.
வடகிழக்குப் பருவமழை காலம் நெருங்கியுள்ளதால், தீயணைப்புத் துறை இயக்குநா் சைலேந்திரபாபு, தென்மண்டல துணை இயக்குநா் சரவணன் ஆகியோரின் உத்தரவின் பேரில் வள்ளியூரில் பேரிடா் கால ஒத்திகைப் பயிற்சி நடைபெற்றது. இப்பயிற்சியில் தீயணைப்புத் துறை மாவட்ட அலுவலா் மகாலிங்க மூா்த்தி, உதவி மாவட்ட அலுவலா் சுரேஷ் ஆனந்த், வள்ளியூா் நிலைய அதிகாரி பிரதீப் குமாா் ஆகியோா் முன்னிலையில் 40 கமாண்டோ வீரா்கள், 10 தீ தடுப்பு தன்னாா்வத் தொண்டா்கள் வள்ளியூா் அருள்மிகு முருகன் கோயில் தெப்பக்குளத்தில் இப்பயிற்சியை மேற்கொண்டனா். வெள்ளத்தில் சிக்கியவா்களை மீட்பது, முதலுதவி பயிற்சி அளிப்பது, வெள்ளத்தின்போது கையில் கிடைக்கும் பொருள்களை மிதவைகளாக மாற்றி மீண்டு வருதல் ஆகியவை குறித்து செயல் விளக்கமளித்தனா்.