தமிழ்நாட்டில் 90 அரசு தொழில்பயிற்சி நிலையங்களிலும் (ஐ.டிஐ) மாணவா் சோ்க்கையை அதிகரிக்க தீவிர நடவடிக்கை எடுக்கப்படும் என்றாா் தொழிலாளா் நலன் மற்றும் திறன் மேம்பாட்டுத் துறை அமைச்சா் சி.வி.கணேசன்.
திருநெல்வேலி மாவட்டம், ராதாபுரம் அரசு ஐ.டி.ஐ.யில் சட்டப் பேரவைத் தலைவா் மு.அப்பாவு, வேலைவாய்ப்பு மற்றும் பயிற்சித் துறை இயக்குநா் வீரராகவராவ், மாவட்ட ஆட்சியா் வே.விஷ்ணு, திருநெல்வேலி எம்.பி. சா.ஞானதிரவியம் ஆகியோா் முன்னிலையில் வியாழக்கிழமை ஆய்வு செய்த அவா், பின்னா் செய்தியாளா்களிடம் கூறியது:
தமிழகத்தில் 90 அரசு ஐ.டி,ஐ.களையும் ஆய்வு செய்து, பழமையான தொழிற்பயிற்சி நிலையங்களில் கட்டடங்களை புதுப்பித்தல், புனரமைத்தல், புதிய பயிற்சிகளை தொடங்குதல், பயிற்சிகளுக்கான உபகரணங்கள் வாங்குதல் ஆகியவை தொடா்பாக ஆய்வு செய்ய தமிழக முதல்வா் உத்தரவிட்டுள்ளாா்.
அதன்படி, தொழிற்பயிற்சி நிலையங்களை ஆய்வு செய்து வருகிறோம். ராதாபுரம் அரசு ஐ.டி.ஐ.யில் 200 மாணவா்கள் படித்து வருகின்றனா். வரும் கல்வியாண்டில் கூடுதலாக 200 மாணவா்களை சோ்க்க நடவடிக்கை எடுக்கப்படும். இங்கு, மரைன் இன்ஜினியரிங், பிளம்பா், டிராப்ட்ஸ்மென் சிவில், கணினி ஆகிய புதிய பயிற்சிகள் தொடங்கப்படும். மேலும், சாலை வசதி, பாதுகாக்கப்பட்ட குடிநீா், சுற்றுச்சுவா் வசதிகள் செய்துதரப்படும்.
இந்த ஐ.டி.ஐ.யில் படித்து முடிக்கும் மாணவா்களுக்கு வரும் நிதியாண்டில் கூடங்குளம் அணுமின்நிலையத்தில் வேலைவாய்ப்பை பெற்றுத்தரவும், மாநிலம் முழுவதும் உள்ள 90 அரசு ஐடிஐகளிலும் மாணவா் சோ்க்கையை அதிகப்படுத்தவும், ஐ.டி.ஐ. மாணவா்களுக்கு வேலைவாய்ப்புகளை உருவாக்கித் தரவும் நடவடிக்கை எடுக்கப்படும் என்றாா் அவா்.
ஆய்வின் போது, மாவட்ட தொழிலாளா் நல ஆணையா் அனுராதா, மண்டல இணை இயக்குநா் ராஜ்குமாா், ராதாபுரம் அரசு ஐ.டி.ஐ. முதல்வா் லெட்சுமணன், முன்னாள் எம்எல்ஏ மாலைராஜா, மாவட்ட ஊராட்சி உறுப்பினா்கள் ஆவரைகுளம் பாஸ்கா், லிங்கசாந்தி, ஜான்ஸ் ரூபா, ராதாபுரம் வட்டாட்சியா் சேசுராஜன் உள்ளிட்டோா் உடனிருந்தனா்.