நெல்லையில் காவலா்கள் தபால் வாக்களிப்பு: ஆட்சியா் ஆய்வு

திருநெல்வேலி மாவட்டத்தில் தோ்தல் பணியில் ஈடுபடவுள்ள காவலா்கள் புதன்கிழமை தபால் வாக்கைப் பதிவு செய்தனா். இதனை மாவட்ட ஆட்சியா் விஷ்ணு பாா்வையிட்டு ஆய்வு செய்தாா்.

திருநெல்வேலி மாவட்டத்தில் தோ்தல் பணியில் ஈடுபடும் காவலா்கள், பாளையங்கோட்டை தூய யோவான் மேல்நிலைப் பள்ளியில் தபால் வாக்கை புதன்கிழமை பதிவு செய்தனா். அதை மாவட்ட தோ்தல் அலுவலரும், மாவட்ட ஆட்சியருமான வே.விஷ்ணு, மாநகர காவல் ஆணையா் அன்பு, மாவட்ட காவல் கண்காணிப்பாளா் என்.மணிவண்ணன் ஆகியோா் பாா்வையிட்டு ஆய்வு செய்தனா்.

தொடா்ந்து, மாவட்ட ஆட்சியா் விஷ்ணு செய்தியாளா்களிடம் கூறியது: திருநெல்வேலி மாவட்டத்தில் தோ்தல் பணியில் ஈடுபடும், காவலா்கள் அனைவரும் வாக்களிக்க ஏதுவாக, தபால் வாக்குகள் மத்திய தோ்தல் ஆணைய அறிவுரையின்படி வழங்கப்பட்டுள்ளது. அதன்படி, காவலா்கள் தபால் வாக்குகள் செலுத்த ஏற்பாடு செய்யப்பட்டுள்ளது.

9 ஆவது பட்டாலியன் காவலா்கள் 195 போ், 12 ஆவது பட்டாலியன் காவலா்கள் 29 போ், மாநகர காவலா்கள் 1,033 போ், மாவட்ட காவல்துறையினா் 1,194 போ் என 2,451 போ் இப்போது தபால் வாக்குகளை செலுத்தி வருகின்றனா்.

மாநகர காவலா்கள், மாவட்ட காவலா்கள் என இரு பிரிவுகளாக பிரித்து 5 சட்டப் பேரவைத் தொகுதிகளுக்கும் தனி வாக்குப்பதிவு அறைகள் அமைக்கப்பட்டு காவலா்கள் தபால் வாக்குகளை செலுத்தி வருகின்றனா்.

பொதுமக்கள் வீட்டை விட்டு வெளியில் செல்லும் போது, முகக் கவசம் கட்டாயம் அணிய வேண்டும். சமூக இடைவெளியை பின்பற்ற வேண்டும். வீட்டை விட்டு வெளியில் சென்று திரும்பும் போது, சோப்பு போட்டு நன்றாக கையை கழுவ வேண்டும். தோ்தல் நாளன்று பயன்படுத்துவதற்காக அனைத்து வாக்குச்சாவடிகளுக்கும் கரோனா தடுப்புப் பொருள்கள் அனுப்பப்பட்டுள்ளன. எனவே, கரோனா பற்றி பொதுமக்கள் யாரும் அச்சப்பட தேவையில்லை என்றாா் அவா்.

நிகழ்ச்சியில் மாவட்ட வருவாய் அலுவலா் (ஒழுங்கு நடவடிக்கை ஆணையா்) எம்.சுகன்யா, ஆட்சியரின் நோ்முக உதவியாளா் (பொது) எம்.கணேஷ்குமாா், பாளையங்கோட்டை வட்டாட்சியா் செல்வன், ஆட்சியா் அலுவலக மேலாளா் வெங்கடாச்சலம், உதவி மக்கள் தொடா்பு அலுவலா் எம்.எஸ்.மகாகிருஷ்ணன் உள்பட பலா் கலந்துகொண்டனா்.