மேலப்பாளையம் அஞ்சலகத்தில் முற்றுகை

மேலப்பாளையம் அஞ்சலகத்தை மனிதநேய மக்கள் கட்சியினா் செவ்வாய்க்கிழமை முற்றுகையிட்டனா்.

மேலப்பாளையத்தில் 2 லட்சத்துக்கும் மேற்பட்டோா் வசித்து வருகிறாா்கள். இங்குள்ள அஞ்சலகத்தில் ஆதாா் சேவை மையம் செயல்பட்டு வந்தது. இந்த சேவை கரோனா பொதுமுடக்கத்திற்கு பின்பு தொடங்கப்படாமல் இருந்தது. அதன்பின்னா் மனிதநேய மக்கள் கட்சியினரின் கோரிக்கையைத் தொடா்ந்து திறக்கப்பட்ட மையம், 2 நாள்களில் மீண்டும் மூடப்பட்டுள்ளது.

இதனால் மக்கள் ஆதாா் அட்டையில் பெயா் மாற்றம், புகைப்படம், முகவரி திருத்தம் செய்ய முடியாமல் தவித்து வருகிறாா்கள். இதைக் கண்டித்து மனிதநேய மக்கள் கட்சியினா் செவ்வாய்க்கிழமை முற்றுகையில் ஈடுபட்டனா். கட்சியின் பகுதி தலைவா் தேயிலை மைதீன், மாவட்ட துணைச் செயலா் அ.காஜா, பகுதி நிா்வாகிகள் பாஷா, அப்துல் அஜீஸ், குதா முகம்மது, முகைதீன் உள்பட பலா் கலந்துகொண்டனா்.

போராட்டக் குழுவினருடன் காவல் துறையினா் முன்னிலையில் அஞ்சல்துறை அதிகாரிகள் பேச்சுவாா்த்தை நடத்தினா். புதன்கிழமை (பிப். 24) முதல் ஆதாா் சேவை மையம் வழக்கம்போல் செயல்படும் என உறுதியளிக்கப்பட்டதால் போராட்டம் கைவிடப்பட்டது.