பாளையங்கோட்டை சிறையில் கைதி அடித்துக் கொல்லப்பட்ட வழக்கில் சிறை அதிகாரிகள் மீது வழக்குப் பதியக் கோரி, திருநெல்வேலி மாவட்ட ஆட்சியா் அலுவலகம் முன் திங்கள்கிழமை 3 இளைஞா்கள் தீக்குளிக்க முயன்றனா். இதனால், பரபரப்பு ஏற்பட்டது.
பாளையங்கோட்டை மத்திய சிறையில் கடந்த ஏப். 22ஆம் தேதி கைதிகளிடையே ஏற்பட்ட தகராறில், நான்குனேரி அருகேயுள்ள வாகைக்குளத்தைச் சோ்ந்த முத்துமனோ என்ற கைதி அடித்துக் கொல்லப்பட்டாா். இந்த வழக்கில் 7 சிறை அதிகாரிகள், சிறைக் காவலா்கள் இடைநீக்கம் செய்யப்பட்டுள்ளனா். சிறைக் கண்காணிப்பாளா் காத்திருப்போா் பட்டியலில் வைக்கப்பட்டுள்ளாா்.
எனினும், சிறைக் கண்காணிப்பாளா் உள்ளிட்டோா் மீது கொலை வழக்குப் பதிந்து நடவடிக்கை எடுக்க வேண்டும். அதுவரை, முத்துமனோ உடலை வாங்க மாட்டோம் எனக்கூறி அவரது உறவினா்கள் 55 நாள்களாக போராட்டத்தில் ஈடுபட்டுள்ளனா்.
இந்நிலையில், சம்பந்தப்பட்ட சிறை அதிகாரிகள் மீது வழக்குப் பதியக் கோரி விக்கிரமசிங்கபுரம் டாணாவைச் சோ்ந்த காா்த்திக் (20), மானூா் அருகேயுள்ள ரெட்டியாா்பட்டியைச் சோ்ந்த முருகன் (28), மேலப்பாளையம் குறிச்சியைச் சோ்ந்த அம்மு (24) ஆகியோா் ஆட்சியா் அலுவலகம் முன் திங்கள்கிழமை மண்ணெண்ணெய் ஊற்றித் தீக்குளிக்க முயன்றனா். அவா்களை போலீஸாா் தடுத்து நிறுத்தி பாளையங்கோட்டை காவல் நிலையத்துக்கு அழைத்துச் சென்றனா்.
இதனால் ஆட்சியா் அலுவலக வளாகத்தில் பரபரப்பு ஏற்பட்டது. இதுகுறித்து பாளையங்கோட்டை போலீஸாா் வழக்குப் பதிந்து விசாரித்துவருகின்றனா்.