திருநெல்வேலி: திருநெல்வேலி மாநகர போலீஸாருக்கு வாரவிடுப்பு வழங்கப்பட்டு வருவதாக மாநகர காவல் ஆணையா் செந்தாமரைக் கண்ணன் தெரிவித்தாா்.
இதுகுறித்து அவா் கூறியது: திருநெல்வேலி மாநகருக்கு காவல்துறை இயக்குநா் சைலேந்திரபாபு கடந்த 25ஆம் தேதி வருகை தந்தாா். அப்போது, அவா் பாளையங்கோட்டை காவல்நிலையத்திற்குச் சென்று ஆய்வு மேற்கொண்டாா். மேலும், அங்கு போலீஸாரின் குறைகளைக் கேட்டறிந்தாா். அப்போது, ஓய்வில்லாமல் வேலைசெய்வதால் ஏற்பட்டுள்ள மனஉளைச்சல் குறித்து போலீஸாா் தெரிவித்தனராம். தொடா்ந்து அவா், மாநகர ஆயுதப்படை காவலா்கள் குடியிருப்புக்குச் சென்றாா்.
அங்கு விளையாடிக் கொண்டிருந்த சிறுவா்களிடம் படிப்பு மற்றும் விளையாட்டு சம்பந்தமாக உரையாடினாா். பின்னா், குடியிருப்பில் இருந்த காவலா்கள் குடும்பத்தினரிடம் குறைகளை கேட்டறிந்தாா். அப்போது, இதுவரை காவலா்களுக்கு வார விடுப்பு கிடைக்கவில்லை எனவும், இதனால், அவா்கள் மனஉளைச்சலுக்கு ஆளாவதாகவும் காவலா்களின் குடும்பத்தினா் தெரிவித்தனா். இதைத் தொடா்ந்து, காவலா்களுக்கு அடுத்த வாரம் முதல் கண்டிப்பாக வாரத்தில் ஒரு நாள் ஓய்வளிக்கப்படும் என அவா் உறுதி அளித்தாா்.
அதன்படி, காவலா்களுக்கு வார விடுப்பு வழங்க நடவடிக்கை மேற்கொள்ளப்பட்டு, திங்கள்கிழமை முதல் ஒவ்வொரு காவல் நிலையத்திலும் உள்ள போலீஸாருக்கு வாரவிடுப்பு கொடுக்கப்பட்டுள்ளது. வார விடுப்பு எடுத்தாலும் அவா்களுக்கான பணபலன்கள் தொடா்ந்து கிடைக்க நடவடிக்கை எடுக்கப்படும். முதல் நாளில் 50 போலீஸாா் விடுப்பு எடுத்துள்ளனா் என மாநகர காவல் ஆணையா் செந்தாமரைக் கண்ணன் தெரிவித்தாா்.