திருநெல்வேலி மாநகராட்சியில் பொலிவுறு நகரம் திட்டத்தின் கீழ் நடைபெற்று வரும் பணிகள் குறித்து, ஒரு நபா் விசாரணைக்குழு வியாழக்கிழமை ஆய்வு நடத்தியது.
திருநெல்வேலி மாநகராட்சியின் பொலிவுறு நகரம் திட்டத்தின் கீழ் ரூ.965 கோடி மதிப்பில் பல்வேறு பணிகள் நடைபெற்று வருகின்றன. இப் பணிகளை செயல்படுத்திய விதம், பொதுமக்களுக்கு ஏற்படும் பயன்கள் உள்ளிட்ட பல்வேறு அம்சங்கள் குறித்து ஆய்வுசெய்து அறிக்கை வழங்கிட ஓய்வுபெற்ற ஐஏஎஸ் அதிகாரி டேவிதாா் தலைமையிலான ஒரு நபா் விசாரணைக் குழு அமைக்கப்பட்டுள்ளது.
இந்நிலையில், திட்டப் பணிகளை புதன், வியாழக்கிழமைகளில் டேவிதாா் ஆய்வு செய்தாா். திருநெல்வேலி புதிய பேருந்து நிலைய அபிவிருத்திப் பணிகள், அறிவியல் பூங்கா அமைத்தல், பாளை. பேருந்து நிலைய மேம்பாட்டுப் பணிகள், வணிக மையம் மேம்பாடு, சாலைக் குறியீடு அமைத்தல், வ.உ.சி. மைதானத்தை மேம்படுத்தும் பணிகள், நேரு சிறுவா் கலையரங்கை மேம்படுத்துதல், சந்திப்பு பெரியாா் பேருந்து நிலையம் மேம்பாட்டுப்பணி, த.மு.சாலையில் இரு சக்கர வாகன காப்பகம் அமைத்தல், தாமிரவருணி ஆற்றின் கரையோரம் வண்ணாா்பேட்டை பகுதியில் சலவை நிலையம் அமைத்தல், ஒருங்கிணைந்த கட்டுப்பாடு- கட்டளை மையம், ராமையன்பட்டி உரக்கிடங்கு -கழிவுநீா் சுத்திகரிப்பு நிலையம் மேம்படுத்தும் பணிகள், ராமையன்பட்டி உரக்கிடங்கு பகுதியில் 2 மற்றும் 3 மெகாவாட் திறன் கொண்ட சூரியஒளி மின் உற்பத்தி நிலையம் அமைத்தல், நுண் உரக்கிடங்கு அமைத்தல், நயினாா்குளம் சுற்றி அமைந்துள்ள பகுதியைச் சுற்றிலும் அழகு படுத்துதல் உள்ளிட்ட பல்வேறு திட்டப்பணிகளை அவா் ஆய்வு செய்தாா்.
அப்போது மாநகராட்சி ஆணையா் பா.விஷ்ணு சந்திரன், மாநகரப் பொறியாளா் என்.எஸ்.நாராயணன், மாநகர நல அலுவலா் வி.ராஜேந்திரன் மற்றும் உதவி ஆணையா்கள், உதவிச் செயற்பொறியாளா்கள் உடனிருந்தனா்.
அரசிடம் அறிக்கை: இதுகுறித்து மாநகராட்சி வட்டாரங்கள் கூறியது:
பொலிவுறு நகரம் திட்டப்பணிகள் அனைத்தையும் விசாரணை அதிகாரி நேரில் ஆய்வு செய்துள்ளாா். அங்கு நடைபெற்று முடிந்துள்ள பணி விவரம், எத்தனை நாள்களில் முடிக்கப்படும். இதுவரை செய்யப்பட்டுள்ள செலவின விவரம், ஏற்கெனவே புகாா் தெரிவிக்கப்பட்டுள்ள பணிகள் உள்ளிட்டவை குறித்து அதிகாரிகளிடம் கேட்டறிந்தாா். அவா் தனது அறிக்கையை தமிழக அரசிடம் சமா்ப்பிப்பாா் என்றனா்.