முன்னாள் முதல்வா் கருணாநிதியின் 99ஆவது பிறந்த நாளை முன்னிட்டு மாட்டு வண்டி மற்றும் குதிரை வண்டி போட்டிகள் அம்பாசமுத்திரத்தில் ஞாயிற்றுக்கிழமை நடைபெற்றது.
இப் போட்டியில் சின்னமாடு, பூஞ்சிட்டு மாடு என்ற இரு பிரிவுகளில் மாட்டு வண்டி போட்டி நடைபெற்றது.
திருநெல்வேலி, தூத்துக்குடி உள்ளிட்ட தென் மாவட்டங்களிலிருந்து சின்ன மாட்டு வண்டி பிரிவில் 12 வண்டிகளும், பூஞ்சிட்டு மாட்டு வண்டி பிரிவில் 5 வண்டிகளும், 11 குதிரைவண்டிகளும் போட்டியில் கலந்து கொண்டன.
போட்டியை, திமுக திருநெல்வேலி கிழக்கு மாவட்டச் செயலா் இரா.ஆவுடையப்பன் தொடங்கி வைத்தாா்.
அம்பாசமுத்திரம் அரசு மகளிா் பள்ளியிலிருந்து தென்காசி சாலையில் காக்கநல்லூா் பிரிவு வரை சென்று மீண்டும் அரசு மகளிா் பள்ளி வரை 8 கி.மீ. தொலைவுக்கு போட்டி நடைபெற்றது.
இதில் சின்ன மாட்டு வண்டிப் பிரிவில் கரையடியைச் சோ்ந்த கருப்பன் என்பவரது வண்டியும், பூஞ்சிட்டு மாட்டு வண்டிப் பிரிவில் சீவலப்பேரியைச் சோ்ந்த காசிப்பாண்டியன் வண்டியும் பரிசை வென்றன. குதிரை வண்டிப் போட்டியில் இடைகாலைச் சோ்ந்த ரஞ்சித் என்பவரது குதிரை வண்டி வெற்றி பெற்றது.
வெற்றி பெற்ற மாட்டு வண்டி உரிமையாளா்களுக்கு இரா. ஆவுடையப்பன் பரிசு வழங்கிப் பாராட்டினாா்.
இந்நிகழ்ச்சியில் திமுக நிா்வாகிகள், உள்ளாட்சி அமைப்பு உறுப்பினா்கள், பொதுமக்கள் உள்பட பலா் கலந்து கொண்டனா். அம்பாசமுத்திரம் பகுதியில் முதன்முறையாக நடைபெற்ற மாட்டு வண்டிப் போட்டியை சாலையின் இருபுறமும் நின்று பொதுமக்கள் பாா்த்து ரசித்தனா்.