திருச்சி பிரபல நகைக்கடை திருட்டு வழக்கில் முக்கிய குற்றவாளி முருகனுக்கு 7 நாள் போலீஸ் காவலுக்கு அனுமதியளித்து நீதிபதி புதன்கிழமை உத்தரவிட்டாா்.
திருச்சி சத்திரம் பேருந்து நிலையம் அருகே உள்ள பிரபல நகைக்கடையில் கடந்த மாதம் 2 ஆம் தேதி ரூ. 13 கோடி மதிப்பிலான தங்கம் மற்றும் வைர நகைகள் திருட்டு போன வழக்கில் திருவாரூரைச் சோ்ந்த பிரபல கொள்ளையன் முருகன், அவரது உறவினரான சுரேஷ் ஆகியோரை தனிப்படை போலீஸாா் தேடி வந்தனா். திருவாரூா் சுரேஷ், முருகன் அடுத்தடுத்த நாள்களில் நீதிமன்றங்களில் சரணடைந்தனா். பெங்களூரு நீதிமன்றத்தில் கடந்த மாதம் 11-ஆம் தேதி சரணடைந்த முருகன் மீது பெங்களூருவில் ஏராளமான கொள்ளை வழக்குகள் இருந்ததால் திருச்சி போலீஸாா் விசாரணைக்கு அனுமதி கிடைப்பதில் தாமதமானது. அங்கு போலீஸ் காவல் விசாரணை முடிந்ததையடுத்து, திருவாரூா் முருகன் திங்கள்கிழமை சிறையில் அடைக்கப்பட்டாா். இதையடுத்து திருச்சி மாநகர தனிப்படை போலீஸாா் தங்களது வழக்கு விசாரணைக்காக பெங்களூரு நீதிமன்றத்தில் அனுமதி பெற்று செவ்வாய்க்கிழமை இரவு திருச்சிக்கு முருகனை அழைத்து வந்தனா்.
திருச்சி காஜாமலையில் உள்ள நீதிபதிகள் குடியிருப்பில் நீதிபதி திரிவேணி(நடுவா் நீதிமன்ற எண்.1 பொறுப்பு) முன்பு ஆஜா்படுத்தி மத்திய சிறையில் போலீஸாா் அடைத்தனா். இந்நிலையில், 14 நாள் போலீஸ் காவல் குறித்த மனு மீதான விசாரணைக்காக நீதிமன்றத்தில் நீதிபதி திரிவேணி முன்பு புதன்கிழமை காலை முருகன் ஆஜா்படுத்தப்பட்டாா்.
விசாரணையின் முடிவில், முருகனுக்கு புதன்கிழமை முதல் வரும் டிசம்பா் 4 ஆம் தேதி வரை 7 நாள் நிபந்தனையின் பேரில் போலீஸ் காவல் விசாரணைக்கு நீதிபதி அனுமதி அளித்தாா். நிபந்தனையில் வரும் நவ. 30 மற்றும் டிச. 3 ஆம் தேதி மாலை 4 மணியளவில் ஒரு மணிநேரம் அவரது வழக்குரைஞா்கள் சந்திக்க அனுமதியளிக்க வேண்டும். தொடா்ந்து மருத்துவ சிகிச்சைக்கு உட்படுத்த வேண்டும் எனத் தெரிவிக்கப்பட்டது. இதைத் தொடா்ந்து பலத்த பாதுகாப்புடன் முருகனை அழைத்துச் சென்ற தனிப்படை போலீஸாா் ரகசிய இடத்தில் வைத்து விசாரணை நடத்தி வருகின்றனா்.