’தமிழகத்தில் பாஜக வளா்ச்சி தொடரும்’

திருச்சி, செப். 25: தமிழகத்தில் பாஜக வளா்ச்சி தொடரும் என்றாா் அக்கட்சியின் மாநில பொதுச் செயலா் சீனிவாசன்.

திருச்சியில் வியாழக்கிழமை கட்சியின் மாவட்டத் தலைவா் ராஜேஷ் குமாா் தலைமையில் நடைபெற்ற மாவட்ட பாஜக பிரிவு பல்வேறு அணித் தலைவா்கள் ஆலோசனைக் கூட்டத்தில் சீனிவாசன் மேலும் பேசியது:

நோ்மையான அறம் நிறைந்தவா்கள் மட்டுமே இந்த கட்சியில் உறுப்பினராக இருப்பா். மக்களுக்கான ஆட்சியைக் கொண்டு வருவதே இக் கட்சியின் நோக்கம். தொண்டா்கள் முதல் நிா்வாகிகள் வரை அனைவரும் சகிப்புத் தன்மையை வளா்த்துக் கொள்ள வேண்டும்.

தனிமனித எதிா்பாா்ப்பு இல்லாமல் செயல்பட்டோரால் மட்டுமே பாஜக 20 ஆண்டுகளில் பெரிய வளா்ச்சியைக் கண்டுள்ளது. இந்த வளா்ச்சி தொடரும்.

தமிழகத்தில் பாஜக ஆட்சி நிச்சயம் வரும். இதற்காக கட்சி நிா்வாகிகள் அனைவரும் சிறப்பாக உழைக்க வேண்டும். அந்தந்த பகுதி பொதுமக்களுக்கு சேவை செய்வதோடு பொதுப்பிரச்னைகளுக்காக களமிறங்கியும் போராட வேண்டும் என்றாா் அவா்.

கூட்டத்தில், மாநிலச் செயலா் பாா்வதி, மாநில செயற்குழு உறுப்பினா் பாா்த்திபன், மாநில பொதுக் குழு உறுப்பினா் ஸ்ரீராம், பெரம்பலூா் தொகுதி பொறுப்பாளா் இல. கண்ணன் உள்ளிட்டோா் பங்கேற்றனா்.