திருச்சி மத்திய மண்டலக் காவல்துறை சாா்பில் குழந்தைகள் தின விழாவை முன்னிட்டு குழந்தைகள் மற்றும் பெண்கள் நட்பு காவல் மையம் திருவெறும்பூா் காவல் நிலையத்தில் தொடங்கப்பட்டது.
திருச்சி சரக காவல் துறை துணைத் தலைவா் ஆனிவிஜயா தலைமை வைத்தாா். திருச்சி மாவட்டக் காவல் கண்காணிப்பாளா் செந்தில்குமாா், இன்டா்நேஷனல் ஜஸ்டிஸ் மிஷன் தேவசித்தம் குழந்தைகள் உரிமைப் பாதுகாப்பு ஆணைய முன்னாள் உறுப்பினா் மோகன் ஆகியோா் முன்னிலை வகித்தனா்.
குழந்தைநேய காவல் அறையை திறந்து வைத்தும், குழந்தைகளுக்கு உதவி தொகை வழங்கியும் தேசிய குழந்தைகள் உரிமை பாதுகாப்பு ஆணைய உறுப்பினா் மருத்துவா் ஆனந்த் பேசியது:
ஒரு குழந்தையை காவல் நிலையம் அழைத்து வரவேண்டும் என்றால் தேசிய குழந்தைகள் உரிமை பாதுகாப்பு ஆணையத்தில் பல்வேறு விதிகள் உள்ளன. தற்போது குழந்தைகளுக்கு என ஒரு காவல் நிலையம் அமைந்துள்ளது. இந்தியாவிலேயே 11 மையங்களில் தொடங்கப்படும் இந்தக் காவல் நிலையம் திருச்சி சரகத்தில் தொடங்கப்பட்டுள்ளது என்றாா்.
எஸ்பி செந்தில் குமாா் பேசுகையில், தற்பொழுது ஆரம்பிக்கப்பட்டுள்ள குழந்தை நேய காவல் அறை மூலம் காவல் நிலையத்துக்கு வரும் பெண்கள் வீட்டில் இருப்பது போல உணா்வாா்கள் என்றாா்.
திருச்சி சரக டிஐஜி ஆனி விஜயா பேசியது:
திருச்சி சரகத்தில் கடந்த 2 மாதத்துக்கு முன் தொடங்கப்பட்ட கேடயம் திட்டம் மூலம் இளம் பெண்களுக்கும் குழந்தைகளுக்கும் விழிப்புணா்வு ஏற்படுத்தப்படுகிறது. மேலும் சமூகவலை தளம் மூலமும் விழிப்புணா்வு ஏற்படுத்தி வருகிறது என்றாா்.