திருச்சி மாவட்டத்தில் அதிகரித்து வரும் கரோனா பரவலைத் தடுக்க மீண்டும் கரோனா சிறப்பு மையங்களை தயாா்படுத்தும் பணி தொடங்கியுள்ளது.
திருச்சி மாவட்டத்தில் கடந்தாண்டு திருச்சி அரசு மருத்துவக் கல்லூரி மருத்துவமனையில் கரோனா சிறப்பு சிகிச்சை மையம் ஏற்படுத்தப்பட்டது. மேலும், கள்ளிக்குடி சந்தை, பாரதிதாசன் பல்கலைக் கழக காஜாமலை வளாகம், அரசு பொறியியல் கல்லூரி, ஸ்ரீரங்கம் யாத்ரி நிவாஸ் மற்றும் மாவட்ட அரசு மருத்துமனைகள், வட்டாரத் தலைமை மருத்துவமனைகளில் கரோனா சிறப்பு மையங்கள் ஏற்படுத்தப்பட்டு தீவிர தடுப்பு நடவடிக்கைகள் மேற்கொள்ளப்பட்டன.
இதன் பயனாக, மாவட்டத்தில் தொற்றுப் பரவல் குறைந்து இந்த மையங்களும் மூடப்பட்டன. தற்போது, 2 ஆம் கட்டமாக தமிழகம் முழுவதும் தொற்றுப் பரவல் தொடங்கியுள்ளது. திருச்சி மாவட்டத்திலும் கரோனா பாதிப்பு நாளுக்கு, நாள் உயா்ந்த வண்ணம் உள்ளது.
மாவட்டத்தில் வியாழக்கிழமை ஒரே நாளில் 131 பேருக்கு தொற்று உறுதியானது. வியாழக்கிழமை நிலவரப்படி 938 போ் வீடுகள் மற்றும் மருத்துவமனைகளில் தனிமைப்படுத்தப்பட்டு சிகிச்சை பெறுகின்றனா்.
இதுவரை மாவட்டத்தில் கரோனாவால் பாதிக்கப்பட்ட 16,568 பேரில், 15,442 போ் குணமடைந்து வீடு திரும்பியுள்ளனா். 188 போ் உயிரிழந்துள்ளனா்.
இந்நிலையில், 2-ஆம் கட்ட கரோனா பரவலால் மாவட்ட நிா்வாகமானது தடுப்பு நடவடிக்கைகளை மீண்டும் துரிதப்படுத்தியுள்ளது. திருச்சி அரசு மருத்துவக் கல்லூரி மருத்துவமனையில் மீண்டும் கரோனா சிறப்பு மையம் தொடங்கப்பட்டு, கூடுதலாக 430 படுக்கைகள் தயாா் நிலையில் உள்ளன. இதேபோல, காஜாமலை பகுதியிலுள்ள பாரதிதாசன் பல்கலைக் கழக வளாகத்திலும் சிறப்பு மையம் தயாா்படுத்தப்பட்டது.
இந்த மையங்களை, மாவட்ட ஆட்சியா் எஸ். திவ்யதா்ஷினி வியாழக்கிழமை பாா்வையிட்டு ஆய்வு செய்தாா். தனிமைப்படுத்தப்படுவோா் தங்கும் அறைகளில் போதுமான வசதிகள் உள்ளதா என மருத்துவா்களுடன் ஆலோசனை நடத்தினாா். இதேபோல, மாவட்டத்தில் முதன்முதலில் தொடங்கப்பட்ட அனைத்து சிறப்பு மையங்களையும் மீண்டும் தேவைக்கேற்ப புதுப்பிக்கவும் உத்தரவிடப்பட்டுள்ளது.
உள்ளாட்சி அமைப்புகள், சுகாதாரத் துறை, குடும்ப நலத்துறை மற்றும் அரசு தலைமை மருத்துவமனை, வட்டாரத் தலைமை மருத்துவமனை மருத்துவா்கள், செவிலியா்கள், சுகாதாரப் பணியாளா்கள், துப்புரவுப் பணியாளா்கள் ஒருங்கிணைந்து பணிகளை மேற்கொள்ள அறிவுறுத்தப்பட்டுள்ளது.
திருச்சி மாநகராட்சிக்குள்பட்ட 65 வாா்டுகளில் வீடுகள்தோறும் சென்று காய்ச்சல் சோதனைப் பணியில் சுகாதாரத் துறையினா் ஈடுபட்டுள்ளனா்.
ஒருவருக்கு நாளொன்றுக்கு 50 வீடுகள் என்ற அடிப்படையில் 65 வாா்டுகளிலும் ஒரு வீடு கூட விடுபடாத வகையில் அனைவருக்கும் கரோனா, காய்ச்சல் பரிசோதனை மேற்கொள்ளப்படுகிறது. மருத்துவ உதவி தேவைப்படுவோரை உடனடியாக அரசு மருத்துவமனைக்குப் பரிந்துரைத்து ஆம்புலன்ஸ் மூலம் அழைத்துச் செல்லப்படுகின்றனா்.
மாவட்டத்தில் கரோனா பரவலைத் தடுக்க மாவட்ட நிா்வாகம் மேற்கொள்ளும் நடவடிக்கைகளுக்கு பொதுமக்கள் முழுமையாக ஒத்துழைக்க வேண்டும் என ஆட்சியா் எஸ். திவ்யதா்ஷினி வேண்டுகோள் விடுத்துள்ளாா்.