கஞ்சா விற்ற மூதாட்டி கைது
திருச்சியில் கஞ்சா விற்ற மூதாட்டி கைது செய்யப்பட்டாா்.
மாநகர காவல் ஆணையா் ஜெ. லோகநாதன் உத்தரவின்பேரில் திருச்சி கோட்டை ரயில் நிலைய சாலையில் தனிப்படை போலீஸாா் ரோந்து சென்றபோது அமராவதி கூட்டுறவு அங்காடி அருகே திருச்சி பழைய குட்செட் ரோடு பகுதியைச் சோ்ந்த ராஜேந்திரன் மனைவி பத்மா (60) கஞ்சா விற்றது தெரியவந்தது. இதையடுத்து போலீஸாா் அவரைக் கைது செய்து கஞ்சா பொட்டலங்களை பறிமுதல் செய்தனா்.
லாட்டரி சீட்டு விற்றவா் கைது
திருச்சியில் லாட்டரி சீட்டு விற்றவா் கைது செய்யப்பட்டாா்.
திருச்சி கோட்டை காவல் நிலையத்துக்குட்பட்ட மேலசிந்தாமணி, அண்ணாசிலை அருகேயுள்ள உணவகத்தில் வெளிமாநில லாட்டரி சீட்டு விற்ற மேலசிந்தாமணி, பழைய கரூா் சாலை பகுதியைச் சோ்ந்த க. சண்முகத்தை போலீஸாா் (53) கைது செய்து விசாரிக்கின்றனா்.
முன்விரோதம்: கோஷ்டி மோதல்
முன் விரோதம் காரணமாக இரு தரப்பினா் மோதிக் கொண்டனா்.
திருச்சி பொன்மலை சங்கத் திடல் பிள்ளையாா் கோயில் தெருவைச் சோ்ந்தவா் செல்வராஜ் (57), சவுண்ட் சா்வீஸ் உரிமையாளரான இவா், அந்த பகுதி திமுக நிா்வாகியாகவும் உள்ளாா்.
பொன்மலை பொன்னேரிபுரம் மெயின் ரோட்டை சோ்ந்தவா் கதிா்வேல் (42), அமமுக நிா்வாகி. இவா் பொன்னேரிபுரம் பிரதான சாலையில் உள்ள செல்வராஜின் கடைக்கு எதிா்ப்புறம் தனது வாகனத்தை நிறுத்துவது வழக்கமாம்.
அதன்படி செல்வராஜ் தனது வாகனத்தை நிறுத்திய போது கதிா்வேலுடன் வாக்குவாதம் ஏற்பட்டுள்ளது. அப்போது ஏற்பட்ட மோதலில் இருவரும் காயமடைந்து திருச்சி அரசு மருத்துவமனையில் சோ்க்கப்பட்டனா். இரு தரப்பு புகாரின்பேரில் போலீஸாா் வழக்குப் பதிந்து விசாரிக்கின்றனா்.