வரும் சட்டப்பேரவைத் தோ்தலில் அதிமுக கூட்டணிக்கு ஆதரவளிப்பதாக தேவேந்திர கிறிஸ்தவா் நல இயக்கத் தலைவா் அருள் ஜஸ்டின் திரவியம் தெரிவித்தாா்.
இதுகுறித்து திருச்சியில் அவா் ஞாயிற்றுக்கிழமை மேலும் கூறியது:
வரும் பேரவைத் தோ்தலில் மதச்சாா்பற்ற முற்போக்குக் கூட்டணியை ஆதரிக்க வேண்டும் என்று கிறிஸ்தவ ஆயா்கள் அறிக்கை வெளியிட்டுள்ளனா். இது ஒட்டுமொத்த கிறிஸ்தவா்களுக்கு செய்யும் அநீதி. தமிழக கத்தோலிக்கச் திருச்சபையில் தேவேந்திர கிறிஸ்தவா்களை ஆயா்களாகவும், மறைமாவட்ட குருக்களாகவும் நியமிக்காமல் சாதிப் பாகுபாடுடன் ஆயா்களும், குருக்களும் நடந்துகொள்கின்றனா்.
சிறுபான்மைக் கல்வி நிறுவனங்களில் தேவேந்திர கிறிஸ்தவா்களுக்கு வேலைவாய்ப்பு முற்றிலும் மறுக்கப்படுகிறது. தேவேந்திர குல வேளாளா்களின் நீண்ட நாள் கோரிக்கையை ஏற்று அரசாணை வழங்க நடவடிக்கை எடுத்து வரும் பிரதமா் மோடி தலைமையிலான மத்திய அரசுக்கும், இதற்கு உறுதுணையாக இருந்த தமிழக முதல்வா் எடப்பாடி பழனிச்சாமி தலைமையிலான அதிமுக அரசுக்கும் நன்றி.
எனவே, வரும் சட்டப்பேரவைத் தோ்தலில் தேவேந்திர கிறிஸ்தவா் நல இயக்கம் அதிமுக தலைமையிலான கூட்டணியை ஆதரிப்பது என முடிவு செய்யப்பட்டுள்ளது என்றாா். உடன் சங்க நிா்வாகிகள் சங்கா் மற்றும் சகாயம் உள்ளிட்டோா் உடனிருந்தனா்.