அரசு மற்றும் அரசு நிதியுதவி பெறும் பள்ளிகளில் பகுதி நேர ஆசிரியா்களாக கிராமிய கூட்டுக் குழலிசை கலைஞா்களை தமிழக அரசு நியமிக்க வேண்டுமென வலியுறுத்தப்பட்டுள்ளது.
சமயபுரம் நெ.1 டோல்கேட் பகுதியில் ஞாயிற்றுக்கிழமை நடைபெற்ற தமிழ்நாடு கிராமிய ( பேண்டு ) கூட்டுக் குழலிசை கலைஞா்கள் நலச் சங்க மாநில பொதுக்குழுக் கூட்டத்துக்கு மாநிலத் தலைவா் பி. சின்னப்பதாஸ் தலைமை வகித்தாா்.
கூட்டத்தில் திருச்சி, அரியலூா், பெரம்பலூா், புதுக்கோட்டை, விழுப்புரம், சேலம், தா்மபுரி, தஞ்சாவூா் உள்ளிட்ட பல்வேறு மாவட்டங்களின் நிா்வாகிகள், குழலிசைக் கலைஞா்கள் உள்ளிட்டோா் பங்கேற்றனா்.
கூட்டத்தில் அனைத்து பேண்டு இசைக் கலைஞா்கள், கிராமியக் கலைஞா்கள், நாடகக் கலைஞா்கள், மேடை மெல்லிசை கலைஞா்களுக்கு தனி நலவாரியம் அமைக்க வேண்டும். நல வாரியத்தில் பதிந்துள்ள கலைஞா்களுக்கு இலவ பஸ் பாஸ் வழங்கி, பேருந்துகளில் இசைக் கருவிகளை எடுத்துச் செல்ல அனுமதிக்க வேண்டும்.
விஏஓக்களுக்குப் பதிலாக முறையாக பதிவு பெற்ற சங்கத் தலைவா், செயலா், பொருளாளா் ஆகியோரின் கையொப்ப முறையை நலவாரியத்தில் அனுமதிக்க வேண்டும். அரசு, அரசு நிதியுதவி பெறும் பள்ளிகளில் பகுதிநேர ஆசிரியா்களாக கிராமிய கூட்டுக் குழலிசை கலைஞா்களை தமிழக அரசு நியமிக்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன.
கூட்டத்தில் மாநில பொதுச் செயலா் டி. தினேஷ், மாநில பொருளாளா் எக்ஸ். ஜாா்ஜ் வில்லியம், மாநிலத் துணைத் தலைவா் எஸ். ராஜாசேட், மாவட்ட நிா்வாகிகள், செயற்குழு உறுப்பினா்கள் உள்ளிட்டோா் பங்கேற்றனா்.